اسلام آباد(پاکستان پوائنٹ نیوز29۔اگست۔2018ء) انٹرپول نے سابق صدر پرویز مشرف دے ریڈ وارنٹ جاری کرن توں انکار کر دتا، انٹرپول دا کہنا اے کہ سنگین غداری کیس ساڈے قانونی گھیرے وچ نہیں آؤندا، پاکستان دے سابق آرمی چیف خلاف کیس سیاسی نوعیت دے نیں، انج دے کیس وچ ریڈ وارنٹ جاری نہیں کیتے جاندے۔ تفصیل مطابق اسلام آباد دی اُچیچی عدالت نے سنگین غداری کیس دی 20اگست نوں ہون والی سنوائی دوران پرویز مشرف دے وارنٹ گرفتاری جاری ہون مگروں سابق صدر دی گرفتاری نہ ہون اُتے سیکرٹری داخلا نوں آؤندی سنوائی اُتے سدیا سی۔
بدھ نوں اسلام آباد دی اُچیچی عدالت دے سربراہ جسٹس یاور علی تے جسٹس نذر محمد نے سابق صدر پرویز مشرف خلاف غداری کیس دی سنوائی کیتی۔ سنوائی دوران سیکرٹری داخلا وی عدالت وچ پیش ہوئے۔ سیکرٹری داخلا نے عدالت نوں دسیا کہ حکومت نے پرویز مشرف نوں لیان لئی انٹرپول نوں درخاست دتی سی پر انٹروپول نے اوہناں دی درخاست رد کر دتی اے۔ انٹرپول دا کہنا اے کہ سنگین غداری کیس ساڈے قانونی گھیرے وچ نہیں آؤندا۔ پاکستان دے سابق آرمی چیف خلاف کیس سیاسی نوعیت دے نیں، انج دے کیس وچ ریڈ وارنٹ جاری نہیں کیتے جاندے۔
