اسلام آباد(پاکستان پوائنٹ نیوز20۔اگست۔2018ء) احتساب عدالت وچ اج سابق وزیراعظم نواز شریف خلاف العزیزیہ فلیگ شپ ریفرنس کیس دی سنوائی ہوئی۔ تفصیل مطابق احتساب عدالت وچ پیشی مگروں اڈیالا جیل جان توں پہلاں عدالت دے باہر سابق وزیر اعظم نواز شریف نے میڈیا نال غیر رسمی گل بات کردے ہوئے آکھیا کہ میں وزیراعظم ہاؤس دے خرچے اپنے کولوں کردا سی تے اوہدے ثبوت چیکس دی صورت وچ موجود نیں۔
پرچا کار نے سابق وزیر اعظم کولوں سوال کیتا کہ سُنیا اے تُسیں عید ساڈے نال منا رہے او؟جیہدے اُتے نواز شریف نے آکھیا کہ اللہ تہاڈی زبان مبارک کرے۔ دوجے پاسے اک پرچا کار نے سوال کیتا کہ وزیر اعظم نے ساریاں گڈیاں نیلام کرن دا اعلان کیتا اے جیہدے اُتے احسن اقبال نے آکھیا کہ صرف گلاں ای ہون گیاں عمل کُجھ نہیں ہوئے گا۔ چیتے رہوے کہ اج سویرے احتساب عدالت نمبر دو دے جج نے میاں نواز شریف خلاف نیب ریفرنسز کیس دی سنوائی کیتی۔
ایس موقعے تے خواجا حارث دی دوویں ریفرنسز دا فیصلا اکٹھے سُنن دی استدعا منظور کر لی گئی۔ احتساب عدالت نے دوویں ریفرنسز دا فیصلا اکٹھے سُنان دا حکم جاری کیتا۔ ایس موقعے تے خواجا حارث نے دلائل دیندے ہوئے آکھیا کہ احتساب عدالت نمبر 1نے وی تنوں ریفرنسز دا فیصلا اکٹھا سُنان دا فیصلا کیتا سی پر عدالت نے صرف ایون فیلڈ ریفرنس دا فیصلا سُنایا۔ اوہناں نے ہور آکھیا کہ تنوں ریفرنسز دا فیصلا اکٹھا نہ آن دی وجہ توں ہور 2ریفرنسز ایس عدالت منتقل ہوئے۔ ریفرنس دی سنوائی لئی سابق وزیراعظم نوں اڈیالا جیل توں احتساب عدالت لیاندا گیا۔ ایس توں پہلاں اڈیالا جیل دے باہر دو بندیاں نے نواز شریف دے قافلے اُتے پُھل سُٹے پر پولیس اہلکاراں نے دوویں بندیاں نوں گرفتار کر لیا۔
