کراچی(پاکستان پوائنٹ نیوز20۔اگست۔2018ء) کراچی ملیر دے علاقے خادم گوٹھ وچ 6ورھیاں دی بالڑی نال زیادتی دی کوشش اُتے شہریاں نے ملزم فہیم نوں موقعے اُتے پھڑ لیا ۔ ملزم نوں تھانے اپڑایا گیا۔ پر سائٹ تھانا سپر ہائی وی پولیس نے بالڑی نوں لاوارث قرار دے کے ملزم خلاف کارروائی کرن توں انکار کردتا، جیہدے اُتے نوٹس لیند ے ہوئے پی ٹی آئی رکن سندھ اسمبلی دعا بھٹو تھانے اپڑ گئیاں۔ ایس حوالے نال اک ویڈیو وی سوشل میڈیا اُتے وائرل ہو رہی اے تے آکھیا جا رہیا اے کہ ایہ ویڈیو دعا بھٹو دی اے ۔ ویڈیو وچ ویکھیا جا سکدا اے کہ دعا بھٹو نے بالڑی نال زیادتی کرن والے ملزم دے مونہ اُتے چھپڑ ماردے ہوئے آکھیا کہ تہاڈے گھراں وچ بچیاں نہیں نیں۔ اوہ تے اللہ نے فرشتے گھلے تے بالڑی نال ایہ ظلم ہون توں بچ گیا نہیں تے تُسیں اپنی پوری کوشش کیتی۔ تہاڈے لوکاں لئی ڈُب مرن دا مقام اے۔ رکن سندھ اسمبلی دعا بھٹو نے میڈیا نال گل بات کردے ہوئے آکھیا کہ سندھ وچ زینب ورگے واقعات نہیں ہون دیواں گے۔ خدیجہ معصوم بالڑی اے ملزم فہیم وحشی بن کے معصوم بالڑی نوں زیادتی دا نشانہ بنانا چاہندا سی جیہنوں لوکاں نے اک خالی عمارت وچوں رنگے ہتھوں پھڑ لیا۔اوہناں نے آکھیا کہ بڑے افسوس دی گل اے کہ پولیس والیاں نے ملزم خلاف کارروائی کرن توں انکار کر دتا سی پر اسیں اپڑ کے ملزم خلاف مقدمہ وی درج کروایا۔اوہناں دا کہنا سی کہ وارثاں نوں انصاف دوان لئی اوہناں دا ساتھ دیواں گے۔
