اسلام آباد(پاکستان پوائنٹ نیوز15۔اگست۔2018ء) عوامی مسلم لیگ دے سربراہ شیخ رشید نے آکھیا اے کہ شہباز شریف، سعد رفیق تے شاہد خاقان عباسی جیل دا میٹریل نیں تے اڈیالا جیل توں باہر وی اک جیل بنانی چاہیدی۔ تفصیل مطابق بدھ دے دیہاڑے سپیکر و ڈپٹی سپیکر دے چناؤ دے موقعے اُتے میڈیا نوں اپنے بیان وچ اوہناں دا کہنا سی کہ شہباز شریف وکٹاں دے دوویں پاسے کھیڈ رہے نیں۔
شہباز شریف دا احتجاج منظور اے کیونکہ احتجاج اوہناں دا جمہوری حق اے۔ اوہناں نے آکھیا کہ شہباز شریف، سعد رفیق تے شاہد خاقان عباسی نوں جیل گھلنا چاہیدا۔ شیخ رشید دا کہنا سی کہ قومی اسمبلی وچ پاکستان تحریک انصاف دیاں100توں ودھ سیٹاں ہون گیاں۔ عمران خان وزیر اعظم ہون گے تے سپیکر وی پی ٹی آئی توں ہوئے گا ۔ اوہناں دا کہنا سی کہ جے رب سوہنے نوں منظور ہویا تے عمران خان اپنے پنج سال پورے کرن گے۔ اوہناں نے آکھیا کہ (ق) لیگ الیکشن توں پہلے پاکستان تحریک انصاف دا حصہ سی۔ آخر وچ وزارت بارے شیخ رشید دا اک سوال دے جواب وچ کہنا سی کہ جو وزارت وی ملی مینوں قبول اے جے کوئی وزارت نہ ملی تے فیر وی عمران خان نال ٹُراں گا۔
