کراچی(پاکستان پوائنٹ نیوز14۔اگست۔2018ء) اج ملک بھر وچ پاکستان دی 71ویں سالگرھا منائی جا رہی اے۔ ایس موقعے تے سارے سرکاری و نیم سرکاری دفتراں تے تعلیمی اداریاں وچ تقریباں جاری نیں۔ اج پاکستان تحریک انصاف دا وفد وی مزار قائد اُتے حاضری دین لئی گیا، جیہنوں اندر جان دی اجازت نہ ملی۔ تحریک انصاف دے وفد وچ نامزد گورنر سندھ عمران اسماعیل وی شامل سن۔
جیہناں نوں مزار قائد اُتے جان دی اجازت نہ دتی گئی۔ ایس موقعے تے تحریک انصاف دے کارکناں نے احتجاج وی کیتا۔ پر اجازت نہ ملن اُتے تحریک انصاف دا وفد واپس چلا گیا۔ جدکہ عمران اسماعیل مزار قائد دے گیٹ اُتے ای فاتحہ پڑھ کے چلے گئے۔ عمران اسماعیل دا کہنا سی کہ سانوں مزار قائد اُتے جان دی اجازت نہ ملی پر مراد علی شاہ پورے پروٹوکول نال مزار قائد اُتے گئے۔
اوہناں دا کہنا سی کہ مراد علی شاہ دے پروٹوکول دی وجہ توں لوک اندر نہیں جا سکے۔ مزار قائد دے گیٹ نوں لوکاں لئی کھول دینا چاہیدا۔ عمران اسماعیل دا کہنا سی کہ نویں پاکستان دا فائدہ کُجھ ہور لوک چُک رہے نیں۔ سانوں مراد علی شاہ دے پروٹوکول دی وجہ توں مزار قائد اُتے جان دی جازت نہیں ملی۔ ایس موقعے تے عمران اسماعیل دی سکیورٹی گارڈاں نال وی بحث ہوئی۔
