لاہور( پاکستان پوائنٹ نیوز11۔اگست۔2018ء ) بشری مانیکا دے سابق شوہر نے دوجا ویاہ کر لیا۔ خاور مانیکا دی نکاح نامے اُتے دستخط کردے ہوئے دی تصویر سوشل میڈیا اُتے وائرل۔ تفصیل مطابق بشری مانیکا دے سابق شوہر خاور مانیکا دے دوجے ویاہ دیاں خبراں گھم رہیاں نیں۔ اوہناں دی اک تصویر سوشل میڈیا اُتے وائرل ہو رہی اے ۔ تصویر وچ ویکھیا جا سکدا اے کہ خاور مانیکا نکاح نامے اُتے دستخط کر رہے نیں۔
جیہدے مگروں ایہ تاثر زور پھڑ رہیا اے کہ اوہناں نے دوجا ویاہ کر لیا اے۔ میاں خاور مانیکا دے ویاہ دی تقریب لاہور دے اک میرج ہال وچ ہوئی۔ تقریب وچ خاندان تے لاگے دے رشتے داراں نے رلت کیتی۔ چیتے رہوے کہ ایس توں پہلاں اداکارہ نور دے خاور مانیکا نال ویاہ دیاں خبراں آئیاں سن۔ جیہناں بارے گل بات کردے ہوئے اداکارہ دا کہناسی کہ ایس طرحاں دیاں خبراں وچ کوئی سچائی نہیں اے۔
میرے حوالے نال پہلے وی بہت ساریاں افواہواں گھم رہیاں نیں۔ پورے پاکستان دی ٹینشن اک پاسے تے میرے ویاہ دی ٹینشن اک پاسے اے۔ اوہناں دا کہنا سی کہ ساریاں نوں میرے ویاہ دی فکر اے۔ جدوں ویاہ کرنا چاہواں گی اوہناں لوکاں نال صلاح کراں گی جو میرے حوالے نال ایس طرحاں دیاں اوٹ پٹانگ خبراں کھلا رہے نیں۔ اوہناں دا کہنا سی کہ کوئی رشتہ ہے تے دسو پر اپنے دادے دی عمر دا نہیں بلکہ پُتر دی عمر دا۔اوہناں دا کہنا سی کہ تُسیں گھٹو گھٹ میری کلاس تے ویکھو۔ میں اپنی زندگی وچ بہت پرسکون آں الحمد اللہ تے ہمیشہ سکون وچ رہنا چاہنی آں۔
