راولپنڈی( پاکستان پوائنٹ نیوز11۔اگست۔2018ء ) سابق وزیر اعظم نواز شریف دی دھی مریم نواز نے اڈیالا جیل وچ ائر کنڈیشنر لئی درخاست دے دتی اے۔ مریم نواز دی مبینہ درخاست دی تصویر سوشل میڈیا اُتے وائرل ہو گئی۔ درخاست وچ لکھیا گیا اے کہ مریم نواز نے اڈیالا جیل دی انتظامیہ توں ڈاکٹری(طبی) بنیاداں اُتے ائر کنڈیشنر لگوان دی درخاست کیتی اے۔ ایہ درخاست مبینہ طور اُتے 9اگست نوں جیل انتظامیہ نوں گھلی گئی، پر ایس حوالے نال جیل انتظامیہ دا کوئی بیان ساہمنے نہیں آیا۔
چیتے رہوے کہ سابق وزیر اعظم نواز شریف، مریم نواز تے کیپٹن (ر) صفدر اڈیالا جیل وچ ایون فیلڈ ریفرنس وچ احتساب عدالت ولوں سنائی گئی سزا بھگت رہے نیں۔ ایس توں پہلاں سابق وزیراعظم نواز شریف نے وی جیل انتظامیہ نوں ائر کنڈیشنر لان دی درخاست کیتی سی۔ جیہدے مگروں 23جولائی نوں سابق وزیر اعظم نواز شریف نوں اڈیالا جیل وچ نگران وزیر اعلا پنجاب حسن عسکری دی ہدایت اُتے ائر کنڈیشنر دتا گیا۔جیل انتظامیہ نے دسیا سی کہ سابق وزیراعظم نوں ائر کنڈیشنر اوہناں دے ڈاکٹر اظہر کیانی دی رپورٹ اُتے دتا گیا۔تے انج پہلی وار ہویا سی کہ کسے قیدی نوں جیل وچ ائر کنڈیشنر دی سہولت دتی گئی ہوئے۔
