اسلام آباد( پاکستان پوائنٹ نیوز10۔اگست۔2018ء ) پاکستان تحریک انصاف نے چودھری پرویز الہی نوں سپیکر پنجاب اسمبلی بنان دا فیصلا کرلیا۔ میڈیا نال گل بات کردے ہوئے پاکستان تحریک انصاف دے رہنما شاہ محمود قریشی دا کہنا سی کہ اسیں چودھری پرویز الہی نوں سپیکر پنجاب اسمبلی بنان دا فیصلا کیتا اے۔ میڈیا رپورٹ وچ دسیا گیا اے کہ پاکستان تحریک انصاف نے سپیکر قومی اسمبلی لئی اسد قیصر تے گورنر پنجاب لئی چودھری سرور نوں نامزد کر دتا اے۔
وائس چیئرمین پی ٹی آئی شاہ محمود قریشی نے آکھیا کہ پنجاب وچ حکومت بنان دی پوزیشن وچ آ گئے آں۔ اسد قیصر پارلیمانی قانون توں جانو نیں۔ رہنما پی ٹی آئی شاہ محمود قریشی نے میڈیا نال گل بات کردے ہوئے آکھیا کہ قومی اسمبلی وچ اسد قیصر ساڈے قومی اسمبلی دے امیدوار ہون گے۔ اسد قیصر دا ارکان نال سلوک تعریف جوگ اے۔ اوہناں دا کہنا سی کہ دوجا اہم فیصلا پنجاب بارے کیتا اے۔ پنجاب وچ لوکاں نے ساڈے اُتے بھروسہ کیتا اے۔ ساڈے کول پنجاب وچ وزارت اعلا لئی نمبرز پورے ہو گئے نیں۔ اوہناں نے آکھیا کہ چودھری محمد سرور نوں گورنر پنجاب دا امیدوار نامزد کر دتا اے۔ کیونکہ چودھری سرور دا تجربہ وی اے۔
