لاہور( پاکستان پوائنٹ نیوز10۔اگست۔2018ء ) پاکستان تحریک انصاف دے رہنما عامر لیاقت حسین دا کہنا اے کہ پی سی بی چیئرمین نجم سیٹھی بہت باوقار بندے نیں۔ پر نجم سیٹھی آپ اپنا عہدہ چھڈ دین گے۔ نجم سیٹھی نوں کوئی اوہناں دے عہدے توں نہیں ہٹائے گا بلکہ اوہ آپ ای اٹھ ، دس دناں وچ اپنے عہدے توں مستعفی ہو جان گے۔ نجم سیٹھی دی گل دو چینلاں نال چل رہی اے تے اوہ چھیتی ٹی وی اُتے نظر آن گے۔
دوجے پاسے اک رپورٹ وچ آکھیا گیا اے کہ 25جولائی نوں ہون والے الیکشن مگروں سوشل میڈیا اُتے ایہ سوال گھم رہیا اے کہ عمران خان دی حکومت آن مگروں کیہ پاکستان کرکٹ بورڈ دا چیئرمین وی بدل جائے گا؟پاکستان کرکٹ بورڈ دے چیئرمین نجم سیٹھی کولوں جدوں ایہ سوال کیتا گیا کیہ تُسیں عمران خان دے آن مگروں چیئرمین دے عہدے توں استعفا دے دیو گے؟ جواب وچ اوہناں نے محتاط رہندے ہوئے آکھیا کہ میں پاکستان کرکٹ بورڈ نوں اپنی ذات دی خاطر جھیڑوا(متنازعہ) نہیں بنانا چاہندا۔ جے مینوں عمران خان یاں اوہناں دے کسے وی مشیر ولوں ایہ اشارہ مل گیا کہ اوہ مینوں چیئرمین دی حیثیت نال نہیں ویکھنا چاہندے تے میں آپ اپنا عہدہ چھڈ کے گھر چلا جاواں گا۔
