اسلام آباد( پاکستان پوائنٹ نیوز08۔اگست۔2018ء ) پاکستان تحریک انصاف دے چیئرمین عمران خان دی تیجی بیوی بشری بی بی دی دھی مہرو حیات 6اگست نوں پاکستان تحریک انصاف وچ رلتی ہوئیاں سن، جیہدے مگروں ہن مہرو حیات دے شوہر میاں حیات مانیکا دی وی پاکستان تحریک انصاف وچ رلت دی آس اے۔ سابق امیدوار برائے صوبائی اسمبلی و (ن) لیگ دے رہنما میاں حیات مانیکا دی بیوی مہروحیات نے بنی گالا وچ عمران خان تے بشری بی بی نال ملاقات کیتی۔
سیاسی مبصرین دا کہنا اے کہ میاں حیات مانیکا جو پاکستان تحریک انصاف دے امیدوار برائے قومی اسمبلی نال کولیشن بنا کے الیکشن لڑے سن، پی ٹی آئی وچ رلتی ہو سکدے نیں۔ میاں حیات مانیکا دی سس بشری بی بی نے حیات مانیکا نوں پاکستان تحریک انصاف دے ٹکٹ اُتے الیکشن لڑن دی آفر وی کیتی سی تے آکھیا سی کہ مسلم لیگ (ن) دا ٹکٹ واپس کر دیو پر اوہ مسلم لیگ (ن) دے ٹکٹ اُتے میدان وچ لتھے۔
مسلم لیگ (ن) دے امیدوار قومی اسمبلی احمد رضا مانیکا دے مبینہ رویے دی وجہ توں اوہناں نے پاکستان تحریک انصاف دے امیدوار برائے قومی اسمبلی محمد شاہ کھگہ نال الحاق کر لیا سی پر دوویں ای کامیاب نہ ہو سکے۔ وسیلیاں مطابق سابق صوبائی وزیر میاں عطا مانیکا دی نونہ مہروحیات دی پاکستان تحریک انصاف وچ رلت مگروں ایس خاندان نوں وی حکومت وچ تھاں ملن دی آس ودھ گئی اے۔ پر ہن مہروحیات دے خاوند میاں حیات مانیکا دا وی پاکستان تحریک انصاف وچ رلتی ہون دا امکان اے۔
