کراچی( پاکستان پوائنٹ نیوز08۔اگست۔2018ء ) 2018دے الیکشن وچ پاکستان تحریک انصاف دی کامیابی مگروں عمران خان دے ’تبدیلی‘ دے نعرے نوں بہت شہرت ملی۔ پاکستان تحریک انصاف دے حکومت بنان دے اعلان اُتے ای پاکستانی لوکائی نے اپنیاں کئی امیداں عمران خان تے اوہناں دی جماعت نال جوڑ لئیاں نیں ، جیہناں وچ سبھ توں اہم ملکی معاشی حالات دی بہتری اے۔عمران خان نے اجے تیکر عہدے دا حلف تے نہیں چُکیا پر ایہدے مگروں ای ملک بھر وچ تبدیلی دی لہر دوڑ گئی اے جیہنے لوکائی نوں ہور پراُمید کر دتا اے کہ عمران خان دی حکومت آن نال ملک بھر وچ اک وڈی تبدیلی ویکھن نوں ملے گی تے عمران خان ای اوہ تبدیلی لیان گے جیہدا اوہناں نے قوم نال وعدہ کیتا اے۔عمران خان دے ’تبدیلی‘ دے ایس نعرے دا مذاق اُڈاندے ہوئے اک بھارتی شہری نے سماجی رابطے دی ویب سائٹ فیس بک اُتے اپنی ویڈیو پوسٹ کیتی۔ ویڈیو چ بھارتی شہری نوں سمندر اُتے ویکھیا گیا۔ بھارتی شہری نے ویڈیو وچ اس سمندر نوں کراچی دا سمندر آکھدے ہوئے سمندر کنڈھے لمے پئے ننگے لوک وی وکھائے تے زور زور دی آکھنا شروع کر دتا کہ ’تبدیلی آ گئی ہے‘لوک لمے پئے ہوئے نیں، اوہناں نوں موبائل فون دے چوری ہون دا خطرہ وی نہیں اے۔ ایہو تبدیلی اے جو کراچی وچ آ گئی اے۔ ذکر کیتے گئے بندے نے آکھیا کہ کراچی دے سی وی اُتے دنیا بھر توں لوک گھمن آئے ہوئے نیں تے ایہو تبدیلی اے۔
ویڈیو سوشل میڈیا اُتے وائرل ہوئی تے پاکستانی ورتیندڑاں نے اوس بھارتی شہری نوں تنقید دا نشانہ بنایا۔ پاکستانی ورتیندڑاں دا کہنا سی کہ پہلی گل تے ایہ اے کہ ایہ کراچی دا سمندر نہیں اے۔ دوجی گل ایہ اے کہ ساڈا ملک اسلامی جمہوریہ پاکستان اے تے ایتھے انج دی بے ہودگی نہیں ہوندی جیویں تُسیں وکھا رہے او۔ ورتیندڑاں نے بھارتی شہری نوں تنقید دا نشانہ بناندے ہوئے آکھیا کہ دنیا بھر وچ کُجھ ایس طرحاں دے ان پڑھ وی ہوندے نیں جو بے ہودگی نوں ’تبدیلی‘ تے مارڈنزم دا ناں دیندے نیں۔ کُجھ ورتیندڑاں نے اوس نوجوان دی تربیت اُتے تنقید کیتی۔
