اسلام آباد( پاکستان پوائنٹ نیوز06۔اگست۔2018ء ) پاکستان تحریک انصاف دے چیئرمین عمران خان نے آکھیا اے کہ کارکردگی وکھان لئی پہلے 6مہینے اہم نیں، پرانی سیاست نوں ختم تے عوامی وعدے پورے کراں گے، قرضے لاہن لئی اوورسیز پاکستانیاں نال رابطہ کراں گے، حزب اختلاف کول مولانا فضل الرحمان تے ہے پر اخلاقی و روحانی طاقت نہیں۔ تفصیل مطابق چیئرمین پی ٹی آئی عمران خان دی صدارت ہیٹھ اج پارلیمانی پارٹی دا اجلاس ہویا۔
اجلاس وچ حکومت بنان بارے اہم فیصلے کیتے گئے۔ ایس موقعے تے پی ٹی آئی وچ 9ارکان قومی اسمبلی دی رلت دا دعوا وی کیتا گیا۔پی ٹی آئی دی پارلیمانی پارٹی دے اجلاس نال چیئرمین عمران خان نے خطاب کردے ہوئے آکھیا کہ قوم نال کیتے گئے وعدے پورے کراں گے۔ ملک مالی طور اُتے بحران دا شکار اے۔ ملک نوں مالی بحران وچوں کڈھنا اے۔ قرضیاں دی ادائیگی لئی اوورسیز پاکستانیاں نال رابطہ کیتا جائے گا۔
سیاست عبادت سمجھ کے کرو۔ پرانی سیاست ختم کرنی پئے گی۔ اوہناں نے آکھیا کہ کارکردگی دے پہلے 6مہینے بہت اہم نیں۔ 1970وچ لوکائی نے مستحکم سیاسی اشرافیہ نوں ہرایا۔ ستر دے دہاکے مگروں اج لوکائی نے دو جماعتی نظام نوں شکست دتی۔ انج تواریخ وچ گھٹ ای ہویا اے کہ دو جماعتی نظام وچ تیجی جماعت نوں موقع ملے۔ لوکائی تبدیلی لئی نکلی تے اپنا فیصلا سُنایا۔
عمران خان نے آکھیا کہ پورے ملک وچ جتھے امیدوار دا چہرہ تبدیلی نال نہیں ملدا سی اوتھے لوکائی نے اوہنوں رد کیتا۔ میرے اُتے اج سبھ توں وڈی ذمے واری آن پئی اے۔ عمران خان دا نویں چُنے گئے ارکان اسمبلی نال گل بات کردے ہوئے کہنا سی کہ لوکائی تہاڈے ول ویکھ رہی اے کہ تُسیں اوہناں لئی پالیسیاں بناؤ۔ لوکائی نے تہانوں پارلیمان وچ گھلیا اے تاں جے تُسیں ہیٹھلے طبقے نوں اُتانہ لیجاؤ۔ اوہناں نے آکھیا کہ لوکائی چاہندی اے کہ پارلیمان اوہناں لئی قانون بنائے۔
