اسلام آ باد( پاکستان پوائنٹ نیوز06۔اگست۔2018ء ) نجی ٹی وی چینل دے پروگرام وچ گل بات کردے ہوئے سینئر تجزیہ کار ہارون الرشید نے آکھیا کہ کابینہ بنان دے معاملے اُتے عمران خان دی اینی پکڑ نہیں اے ۔ لوک آکھدے نیں کہ نواز شریف نے تے دو دناں وچ ای کابینہ بنا لئی سی۔ اوہدی اک وجہ تے ایہ سی کہ نواز شریف نوں پتا سی کہ اوہ جت جان گے تے حکومت بنان لئی اوہ ذہنی طور اُتے تیار سن۔
دوجا اوہناں نوں کابینہ بنان دا تجربہ سی تے تیجا ایہ کہ نواز شریف جیہنوں وزارت دینا چاہن دے سکدے نیں، کسے وچ اینی جرات نہیں ہوندی کہ اوہ اوہناں ساہمنے آواز چُکے۔ اوہناں د اکہنا سی کہ مسلم لیگ (ن) وچ وزارت بھیک وچ ای ملدی اے۔ پر خان صاحب وچ بندے پچھانن دا ول نہیں ۔ علیم خان نے الیکشن وچ بہت پیسہ خرچ کیتا ۔ آزاد ارکان نوں لیان لئی جہانگیر ترین نے اپنا جہاز کڈھیا تے خان صاحب دی مدد کیتی۔
ہن ایہ لوک اپنا اپنا صلہ چاہندے نیں۔ جہانگیر ترین اپنا وزیر اعلا لیانا چاہندے سن تے اوہناں نے عمران خان نوں علیم خان دے معاملے وچ منا وی لیا سی۔ پر عمران خان اک وار فیر جو فیصلا کر لیندے نیں اوہدے مگروں صلاح فیر شروع کر دیندے نیں۔ اوہ جو وی فیصلا کردے نیں اوہدے اُتے اڑ جان والے نیں۔ اوہناں وچ مستقل مزاجی اے۔ پر عمران خان سیاسی پیچیدگیاں نہیں سمجھدے تے نہ ای اوہناں دے مشیر اوہناں نال مخلص نیں۔
ایہ مسئلا پہلے دن توں ای اے۔ عمران خان نوں دو توں تن چنگے مشیراں دی ضرورت اے تے میں ناں لے کے آکھنا واں کہ اوہ جہانگیر ترین، شاہ محمود قریشی تے علیم خان نہیں ہو سکدے، کیونکہ جیہناں دا اپنا کوئی مفاد ہوئے اوہ چنگا مشیر نہیں بن سکدا۔ نواز شریف کول وی اوہناں دے بھرا شہباز شریف سن جیہدے اُتے اوہ اعتماد کر سکدے سن۔
