بس تے آئل ٹینکر وچکار ٹکر،13بندے ہلاک،30زخمی

بس تے آئل ٹینکر وچکار ٹکر،13بندے ہلاک،30زخمی

کوہاٹ( پاکستان پوائنٹ نیوز04۔اگست۔2018ء ) کوہاٹ وچ تیز رفتار مسافر بس تے آئل ٹینکر وچکار ٹکر ہوئی اے، ٹکر دے نتیجے وچ 13بندے ہلاک تے 30زخمی ہوگئے، زخمیاں نوں ہسپتال منتقل کر دتا گیا۔ میڈیا رپورٹس مطابق انڈس ہائی وے اُتے سماری چوک نیڑے مسافر بس تے آئل ٹینکر وچکار ٹکر ہو گئی۔ دوویں گڈیاں وچکار ٹکر سپیڈ تیز ہون دی وجہ توں ہوئی ۔مسافر بس تے آئل ٹینکر وچکار ٹکر دے نتیجے وچ13بندے ہلاک تے 30زخمی ہوگئے نیں۔

حادثے دی وجہ توں ہائی وے اُتے ٹریفک دا نظام اُگھر دُگھڑ(درہم برہم) ہوگیا۔ حادثے مگروں ہائی وے پولیس تے ریسکیو ٹیماں حادثے والی تھاں اپڑ گئیاں۔ ریسکیو ٹیماں نے گڈیاں وچوں زخمی بندیاں نوں باہر کڈھیا تے ہسپتال منتقل کردتا۔ دسیا گیا اے کہ ہلاک تے زخمی ہون والے بندیاں وچ مرد تے سوانیاں شامل نیں۔ پر پولیس نے حادثے دی نوعیت جانن لئی قانونی کارروائی شروع کر دتی اے۔ دوجے پاسے ڈپٹی کمشنر خالد الیاس دا کہنا اے کہ مسافر بس تے آئل ٹینکر وچکار حادثہ تیز سپیڈ دی وجہ توں ہویا۔