اسلام آباد( پاکستان پوائنٹ نیوز02۔اگست۔2018ء ) قومی اسمبلی دے دو حلقیاں توں ہار تے پنجاب اسمبلی دے اک حلقے توں فتح مگروں چودھری نثار علی خان دی مسلم لیگ (ن) دی قیادت نال صلح دی آخری کوشش وی دم دے گئی اے۔ وسیلیاں مطا بق پچھلے دیہاڑے چودھری نثار علی خان ولوں مسلم لیگ (ن) دے صدر میاں شہباز شریف راہیں ایہ سنیہا نواز شریف تیکر اپڑایا گیا کہ اوہ عیادت لئی پمز ہسپتال حاضر ہونا چاہندے نیں پر میاں نواز شریف نے ایہ آکھ کہ منع کر دتا کہ تہاڈیاں محبتاں تے نیک خاہشاں دا بہت شکریہ۔
چیتے رہوے کہ پاناما کیس وچ نواز شریف دی نااہلی مگروں مسلم لیگ (ن) دی سیاست دا کالا دور شروع ہویا۔ مسلم لیگ (ن) دی ساکھ اودوں خطرے وچ پئی جدوں پارٹی دے قائد نواز شریف نے عدلیہ، نیب تے پاک فوج سنے ملکی اداریاں نوں تنقید دا نشانہ بنانا شروع کیتا۔ انج دے ماحول وچ پارٹی دے سینئر رہنماواں نے وی نواز شریف توں پچھانہ ہٹن دا فیصلا کیتا۔ ایس ساری صورتحال وچ چودھری نثار علی خان پہلے تے چُپ رہے پر فیر اوہناں نے وی میڈیا کانفرنس، نیوز کانفرنس تے پرچا کاراں نال گل بات دوران پارٹی پالیسیاں دی مخالف کیتی۔
معاملا اودوں خراب ہویا جدوں نواز شریف تے چودھری نثار علی خان وچ دوریاں ودھیاں تے دوریاں دا ذمے وار مریم نواز دی پارٹی پالیسی تے نویں حکمت عملی نوں قرار دتا گیا۔ایہدے مگروں چودھری نثار علی خان نے الیکشن وچ آزاد حیثیت نال میدان وچ آن دا فیصلا کیتا ۔ اوہ قومی اسمبلی دے دوویں حلقیاں توں تے ہار گئے پر صوبائی اسمبلی دی سیٹ جت گئے۔
