گوجرانوالا( پاکستان پوائنٹ نیوز26۔جولائی۔2018ء ) عام انتخابات 2018دے تحت کل ملک بھر وچ پولنگ دا سلسلا سویرے 8وجے توں شروع ہویا جو شام 6وجے تیکر جاری رہیا، ایس دورانیے وچ ملک بھر دے کئی پولنگ سٹیشناں توں الیکشن کمیشن آف پاکستان نوں شکایتاں ملیاں۔ سوشل میڈیا اُتے کئی ووٹراں نے اپنیاں شکایتاں دی ویڈیوز وی پوسٹ کیتیاں جدکہ کئی ووٹراں نے انتخابی ضابطہ اخلاق دی خلاف ورزی کردے ہوئے بیلٹ پیپرز اُتے مہر لان دے بعد تصویراں لے کے سوشل میڈیا اُتے اپ لوڈ کر دتیاں۔
ایہناں تصویراں نوں ویکھدے ہوئے الیکشن کمیشن نے ضابطہ اخلاق دی خلاف ورزی دا نوٹس لیا تے تصویراں اپ لوڈ کرن والے ووٹراں خلاف قانون مطابق کارروائی دا حکم دتا۔ پر گوجرانوالا وچ اک ووٹر موقعے اُتے ای پھڑ لیا گیا۔ میڈیا رپورٹ مطابق حکام نے پولنگ سٹیشن اندر موبائل فون راہیں بیلٹ پیپرز دی تصویر بنان دی کوشش کرن والے نوجوان نوں جرمانہ تے قید دی سزا سنا دتی۔
گوجرانوالا دا رہائشی امان اللہ نامی ووٹر پولنگ سٹیشن اندر موبائل فون لے کے وڑیا ، جیہنے بیلٹ پیپر اُتے مہر لان مگروں اوہدی تصویر بنائی تے فوجی اہلکار نے اوہنوں موقعے تے ای پھڑ لیا۔دوجے پاسے ایس حوالے نال پریزائیڈنگ افسر دا کہنا سی کہ نوجوان نوں دس ہزار رُپئے جرمانہ تے تن مہینے قید دی سزا سنائی گئی اے ۔ نوجوان نوں تھانا دھلے پولیس دے حوالے کر دتا گیا اے۔
