کراچی( پاکستان پوائنٹ نیوز26۔جولائی۔2018ء ) حلقہ این اے 242توں عامر لیاقت حسین نے فاروق ستار نوں ہرا دتا اے۔ کراچی دے حلقہ این اے 245دا غیر سرکاری غیر حتمی نتیجہ ساہمنے آیا اے۔ نتیجے مطابق پاکستان تحریک انصاف دے امیدوا ر عامر لیاقت حسین نے میدان مار لیا اے۔ غیر سرکاری غیر حتمی نتیجے مطابق عامر لیاقت حسین 56ہزار 615ووٹ لے کے پہلے نمبر اُتے رہے جدکہ اوہناں دے مقابلے وچ ایم کیو ایم دے رہنما فاروق ستار 35ہزار 247ووٹ لے دوجے نمبر اُتے رہے۔
چیتے رہوے کہ پچھلے دیہاڑے پاکستانی تواریخ دا سبھ توں مہنگا ترین الیکشن ہویا۔ الیکشن کمیشن ولوں جاری آنکڑیاں مطابق عام انتخابات وچ 840قومی و صوبائی حلقیاں اُتے 11ہزار 673امیدواراں نے حصہ لیا، قومی اسمبلی دے 270 حلقیاں اُتے 3ہزار 428امیدوار میدان وچ لتھے سن جدکہ صوبائی اسمبلیاں دیاں 570سیٹاں اُتے 8ہزار 245امیدواراں وچ مقابلا ہویا۔ قومی اسمبلی دے 270 حلقیاں وچ اک ہزار 623آزاد امیدوار حصہ لے رہے سن۔
صوبائی اسمبلیاں دے حلقیاں اُتے 8245امیدواراں وچوں تن ہزار 856سیاسی جماعتاں دے امیدوار سن۔ خیبرپختونخوا اسمبلی لئی 1145امیدوار میدان وچ سن جدکہ خیبرپختونخوا توں قومی اسمبلی دے حلقیاں اُتے 721امیدوار حصہ لے رہے سن۔ سندھ اسمبلی لئی دو ہزار 179امیدوار میدان وچ سن جدکہ سندھ توں قومی اسمبلی دے حلقیاں لئی 814امیدوار میدان و چ سن۔ پنجاب وچ قومی اسمبلی دے حلقیاں لئی 1534امیدوار میدان وچ سن تے پنجاب اسمبلی لئی 3ہزار 975امیدوار حصہ لے رہے سن۔ بلوچستان وچ قومی اسمبلی دے حلقیاں اُتے 290امیدوار میدان وچ سن۔ ایس طرحاں بلوچستان اسمبلی دے حلقیاں اُتے 946امیدوار میدان وچ سن۔ اسلام آباد دے قومی اسمبلی دے 3حلقیاں اُتے کل 59امیدوار سن۔
