دیامر بھاشا تے مہمند ڈیماں دی اُساری لئی 260ملین رُپئے جمع ہو گئے

دیامر بھاشا تے مہمند ڈیماں دی اُساری لئی 260ملین رُپئے جمع ہو گئے

اسلام آباد( پاکستان پوائنٹ نیوز21۔جولائی۔2018ء ) سپریم کورٹ آف پاکستان دی اُچیچی ہدایت اُتے دیامر بھاشا تے مہمند ڈیمز دی اُساری لئی قائم کیتے گئے اُچیچے فنڈ وچ 260ملین رُپئے دے عطیات جمع کرائے گئے نیں۔ تفصیل مطابق پاکستان بھر وچ ہر آؤندے دن نوں پانی دی کمی وچ وادھا ہو رہیا اے تے ایسے گل نوں مُکھ رکھدے ہوئے سپریم کورٹ نے 2ڈیمز بنان دا حکم جاری کیتا سی۔

پاکستان وچ ڈیمز دی اُساری(تعمیر) لئی آپ چیف جسٹس آف پاکستان جسٹس ثاقب نثار نے وی اپنی جیب وچوں 10لکھ رُپئے عطیہ دتا۔ ایس توں وکھ پاک فوج نے ڈیماں دی اُساری(تعمیر) وچ حصہ پان دا اعلان کیتا۔آئی ایس پی آر مطابق تِنوں فوجاں دے سربراہ و افسر 2 جدکہ جوان اک دن دی تنخاہ کارخیر وچ جمع کروان گے۔ ترجمان پاک فوج میجر جنرل آصف غفور نے آکھیا کہ پاک فوج وی ڈیماں دی اُساری وچ اپنا حصہ ودھ کے پائے گی۔

پاک فوج دیامیر بھاشا ڈیم تے مہمند ڈیم دے فنڈز وچ حصہ قومی فرض سمجھدے ہوئے پائے گی۔ ایس توں وکھ سپریم کورٹ ولوں ڈیماں دی فنڈنگ لئی ایس ایم ایس دا آسان طریقہ کاروی متعارف کروا دتا گیا ، جیہدے تحت موبائل ورتیندڑ(صارف) میسج سروس راہیں 10رُپئے ڈیماں دی اُساری اکاؤنٹ وچ عطیہ کر سکدے نیں۔جیہدے مگروں ہن تیکر سپریم کورٹ آف پاکستان ولوں دیامر بھاشا تے مہمند ڈیماں دی اُساری لئی قائم فنڈ وچ پیسے جمع کروان دا سلسلا جاری اے۔

تازہ اطلاع مطابق دیامر بھاشا تے مہمند ڈیمز دی عملدرآمد کمیٹی(آئی سی ڈی بی ایم ڈی) نے عطیات دی وصولی اُتے اعتماد دا اظہار کیتا اے۔ کمیٹی نے آکھیا کہ اے کہ ملک وچ پانی دے مسئلے دے خاتمہ تے آبی وسائل وچ بہتری لئی ڈیماں دی اُساری ویلے دی اہم ضرورت اے۔ کمیٹی نے ہور آکھیا کہ ڈیماں دی اُساری لئی قائم کیتے گئے اُچیچے فنڈ وچ لوک عطیات جمع کروا رہے نیں تے ہن تیکر ایس حوالے نال 260ملین رُپئے جمع ہوئے نیں۔