لاہور( پاکستان پوائنٹ نیوز20۔جولائی۔2018ء ) پاکستان تحریک انصاف دے چیئرمین عمران خان نے آکھیا اے کہ حکومت بنان لئی پیپلز پارٹی نال اتحاد نہیں ہوئے گا، پیپلز پارٹی تے (ن) لیگ نال اتحاد کرن توں بہتر اے کہ اپوزیشن وچ بیٹھیا جائے، اوہناں نے برطانوی نشریاتی ادارے نوں انٹرویو دیندے ہوئے آکھیا کہ طاقتور حکومت ویلے دی ضرورت اے۔ سانجھی پارلیمنٹ بنی تے بدقسمتی ہوئے گی۔
اوہناں نے آکھیا کہ حکومت بنان لئی پیپلز پارٹی نال اتحاد نہیں ہوئے گا۔ پیپلز پارٹی تے (ن) لیگ نال اتحاد کرن توں بہتر اے کہ اپوزیشن وچ بیٹھیا جائے۔ ایس توں پہلاں چیئرمین تحریک انصاف عمران خان نے اپنے حلقے این اے 131لاہور دے ووٹراں لئی سنیہے وچ آکھیا کہ 25جولائی نوں پاکستان دی تاریخ دا فیصلا ہو رہیا اے۔ ایس الیکشن دے دن قوم اپنی تقدیر بدل سکدی اے۔
اوہناں نے آکھیا کہ ایہ اوہ الیکشن اے جو کدی کدی قوم دی زندگی وچ آؤندا اے۔ عمران خان نے آکھیا کہ جے پیپلز پارٹی تے (ن) لیگ دی تقدیر دا فیصلا ہوندا اے تے فیر تقدیر نہیں بدلے گی۔ این اے 131دے لوکاں نوں میرا سنیہا اے کہ الیکشن والے دن گھروں نکلو تے اپنے قریبی لوکاں نوں وی ووٹ پان لئی باہر کڈھو۔ چیئرمین پی ٹی آئی عمران خان نے آکھیا کہ لوکائی میرے لئی نہیں اپنے بالاں دے مستقبل لئی 25جولائی نوں نکلے۔ اوہناں نے ہور آکھیا کہ 25جولائی نوں اینے ووٹر باہر نکلن کہ مثال بن جائے۔
