اسلام آباد( پاکستان پوائنٹ نیوز20۔جولائی۔2018ء ) چیف جسٹس اسلام آباد ہائی کورٹ نے جسٹس میاں گل حسن اورنگزیب دیاں چھٹیاں رد کر دتیاں ، جسٹس گل حسن اورنگزیب 28جولائی توں 3اگست تیکر کیساں دی سنوائی کرن گے، ڈویژن بنچ سابق وزیر اعظم نواز شریف، اوہناں دی دھی مریم نواز تے داماد صفدر دی ضمانت اُتے رہائی بارے کیس دی سنوائی کرے گا۔ میڈیا رپورٹس مطابق اسلام آباد ہائی کورٹ نے جسٹس میاں گل حسن اورنگزیب دیاں اک ہفتے لئی چھٹیاں منسوخ کر دتیاں نیں۔
عدالتی نوٹی فکیشن مطابق جسٹس گل حسن اورنگزیب 28جولائی توں 3اگست تیکر سنوائی کرن گے۔ چیف جسٹس اسلام آباد ہائی کورٹ دی ہدایت اُتے اسسٹنٹ رجسٹرار لیگل نے نواں نوٹی فکیشن جاری کر دتا اے۔ ڈویژن بنچ سابق وزیر اعظم نواز شریف، اوہناں دی مریم نواز تے کیپٹن (ر) صفدر دی ضمانت اُتے رہائی بارے کیس دی سنوائی کرے گا۔ چیتے رہوے کہ 17جولائی نوں اسلام آباد ہائی کورٹ وچ ایون فیلڈ ریفرنس وچ سزا پان والے نواز شریف، مریم نواز تے کیپٹن (ر) صفدر دی سزا خلاف اپلاں دی سنوائی جسٹس محسن اختر کیانی تے جسٹس میاں گل حسن اورنگزیب اُتے مشتمل ڈویژن بنچ نے کیتی۔
سنوائی دوران نواز شریف دے وکیل خواجا حارث نے دلائل شروع کردے ہوئے 2ریفرنس دوجی عدالت منتقل کرن دی بینتی کردے ہوئے آکھیاکہ جج محمد بشیر اک ریفرنس اُتے فیصلا دے چکے، باقی دو ریفرنس دوجی عدالت منتقل کیتے جان۔ عدالت نے پُچھیا کہ کس بنیاد اُتے کیس ٹرانسفر کرنا چاہیدا اے؟ جیہدے اُتے وکیل خواجا حارث نے آکھیاکہ اک اُتے فیصلا سُنان مگروں جج محمد بشیر دو ریفرنسز اُتے سنوائی نہیں کر سکدے، ملزماں دا دفاع دوجے ریفرنسز وچ وی مشترک اے۔
جسٹس محسن اختر کیانی نے پُچھیا کہ جج جانبدار اے؟جیہدے اُتے وکیل نے آکھیا کہ ساڈا کیس ایہ نہیں اے جج ساڈے خلاف کوئی رنجش رکھدے نیں۔ایس موقعے تے اسلام آباد ہائی کورٹ نے نیب کورٹ نوں نوٹسز جاری کردے ہوئے جواب منگیا تے ریفرنس دوجی عدالت منتقل کرن دی درخاست اُتے سنوائی 30جولائی تیکر ملتوی کر دتی۔ایس توں وکھ عدالت نے نواز شریف، مریم نواز تے کیپٹن (ر) صفدر دیاں سزا واں خلاف اپیلاں اُتے نوٹس جاری کردے ہوئے مقدمے دا ریکارڈ وی منگیا سی۔
