اسلام آباد( پاکستان پوائنٹ نیوز18۔جولائی۔2018ء ) پاکستان دی وڈی نجی ائر لائن اُتے پابندی لان دا فیصلا، شاہین ائر لائن دے سعودی عرب سنے عالمی فلائٹ آپریشن آؤندے ہفتے معطل کیتے جان دا امکان، شاہین ائر لائن تے سول ایوی ایشن وچکار ڈیڈھ ارب رُپئے دی ادائیگی اُتے جھیڑا اے۔تفصیل مطابق سول ایوی ایشن اتھارٹی تے شاہین ائر لائن انٹرنیشنل وچکار ادائیگیاں دے جھیڑے دی وجہ توں شاہین ائر لائن دیاں اُڈاناں معطل ہون دا ڈر اے۔
شاہین ائر دے سعودی عرب توں وکھ ہور عالمی فلائٹ آپریشن نوں آؤندے ہفتے توں معطل کیتے جان دی آس اے۔ ترجمان سول ایوی ایشن اتھارٹی پرویز جارج نے آکھیا کہ سول ایوی ایشن نے اجے تیکر شاہین ائر لائن دیاں ملک اندر تے سعودی اُڈاناں لئی اپنیاں سہولتاں تے خدمتاں معطل نہیں کیتیاں۔ پر ڈیڈھ ارب رُپئے دے قرضے دی وجہ توں شاہین ائر دیاں سعودی عرب توں وکھ ہور باہرلے ملک دیاں اُڈاناں لئی سول ایوی ایشن اتھارٹی دیاں خدمتاں تے سہولتاں دا سلسلا 16جولائی توں معطل کیتا جائے گا۔ ترجمان سول ایوی ایشن نے دسیا اے کہ ایس بارے شاہین ائر نوں پہلے اک نوٹس راہیں تے فیر میڈیا راہیں وی اعلان کیتا جائے گا تاں جے مسافراں نوں کسے قسم دی پریشانی دا ساہمنا نہ کرنا پئے۔
