لاہور( پاکستان پوائنٹ نیوز16۔جولائی۔2018ء ) (ن) لیگ نے شہباز شریف خلاف بغاوت کر دتی، پارٹی اجلاس دوران رہنماواں نے 13جولائی نوں نواز شریف دی واپسی دے موقعے تے ریلی ائر پورٹ نہ لیجان دے معاملے اُتے صدر(ن) لیگ دی کُھل کے مخالفت کر دتی۔ تفصیل مطابق سابق وزیر اعظم و قائد (ن) لیگ نواز شریف تے اوہناں دی دھی مریم نواز دی ملک واپسی اُتے ناکام سیاسی شو دی وجہ توں شہباز شریف اوس دن توں ای پارٹی رہنماواں دی ڈاڈھی تنقید ہیٹھ نیں۔
قومی اخبار دی رپورٹ مطابق (ن) لیگ دے سینئر رہنما 13جولائی دے ناکام سیاسی شو مگروں شہباز شریف توں ناراض نیں۔ ایس حوالے نال حالیہ (ن) لیگ دے اجلاس دوران سینئر رہنماواں نے شہباز شریف دے ساہمنے کُھل کے اپنے تحفظات دا اظہار کیتا۔ سینئر (ن) لیگی رہنماواں نے شہباز شریف توں پُچھیا کہ آخر کیوں (ن) لیگ دی ریلی نواز شریف دے استقبال لئی لاہور ائر پورٹ نہ اپڑ سکی۔
جدکہ ریلی دی گنتی وی کوئی اینی وڈی نہیں سی۔ رپورٹ وچ ہور دسیا گیا اے کہ اجلاس دوران شہباز شریف دے حامی اک رہنما نے تنقید کرن والے رہنماواں نوں جواب دیند ے ہوئے آکھیا، کیونکہ (ن) لیگ مطلوبہ گنتی وچ لوکاں نوں سڑکاں اُتے لیان وچ ناکام رہی سی، ایس لئی ریلی نوں ائر پورٹ نہیں لیجایا گیا۔ جے ریلی ائر پورٹ لیجاندے تے رلتیاں دی گنتی نوں میڈیا اُتے وکھایا جاندا تے انج پارٹی نوں ڈاڈھا نقصان ہوندا۔
جدکہ نواز شریف تے مریم نواز نوں چھیتی اسلام آباد منتقل کر دتا گیا، ایس لئی ریلی نوں ائر پورٹ اپڑن توں پہلاں ای ختم کرن دا اعلان کرنا پیا۔دوجے پاسے وسیلیاں دا ہور دعوا اے کہ نواز شریف اپنے بھرا شہباز شریف توں ڈاڈھے ناراض نیں، اوہناں شہباز شریف نال ملاقات کرن توں وی انکار کردتا اے۔
