لاہور( پاکستان پوائنٹ نیوز14۔جولائی۔2018ء ) مسلم لیگ (ن) دے قائد نواز شریف تے مریم نواز دی ملک واپسی اُتے پارٹی رہنماواں دی قیادت وچ کارکناں نے کئی ریلیاں کڈھیاں پر کارکن ائر پورٹ اُتے اپنے قائد دا استقبال نہ کر سکے۔ ایس حوالے نال گل بات کردے ہوئے مسلم لیگ (ن) دے باغی رہنما زعیم قادری نے (ن) لیگ دیاں ریلیاں ائر پورٹ نہ اپڑن دی وجہ دس دتی۔زعیم قادری دا کہنا سی کہ پارٹی قیادت ولوں نظر انداز کیتا جانا ا ی کارکناں دے ائر پورٹ نہ اپڑن دی وجہ بنیا۔
اوہناں نے آکھیا کہ نواز شریف تے مریم نواز دے استقبال لئی کارکن ائر پورٹ نہیں اپڑ سکے۔ اوہدی وڈی وجہ پارٹی قیادت ولوں کارکناں نوں نظر انداز کیتا جا نا اے۔ زعیم قادری نے آکھیا کہ اسیں 10سال نواز شریف دی غیر موجودگی وچ اوہناں دی جنگ لڑی پر اوہناں نے سانوں شاباش تیکر نہیں دتی، جے اوہ اپنے کارکناں دی قدر کردے تے اوہناں دا اینا مایوس کن استقبال نہ ہوندا۔
نجی ٹی وی چینل نال گل بات کردے ہوئے زعیم قادری نے آکھیا کہ مسلم لیگ (ن) نے کارکناں نوں عزت نہیں دتی، جیہدا نتیجہ ہن اوہناں دے ساہمنے اے۔ الیکشن دے حوالے نال گل بات کردے ہوئے سابق صوبائی وزیر دا کہنا سی کہ عام انتخابات 2018وچ بھرپور کامیابی حاصل کراں گا، اک دن وچ حلقے اندر اٹھ جلسے کر رہیا واں، لوکائی میرے نال اے۔ اوہناں دا کہنا سی کہ عام انتخابات وچ بھرپور طریقے نال حصہ لواں گا۔ میں اپنے کارکناں دی عزت کرنا واں تے میرے کارکن ای میرا اثاثہ نیں۔ چیتے رہوے کہ سابق صوبائی وزیر و مسلم لیگ (ن) دے باغی رہنما زعیم قادری نے پارٹی قیادت نال ناراضگی دا اظہار کردے ہوئے عام انتخابات 2018وچ آزاد امیدوار دے طور اُتے الیکشن لڑن دا اعلان کیتا۔
