میری زندگی دے صرف دو ای مقصد نیں: چیف جسٹس نے اعلان کر دتا

میری زندگی دے صرف دو ای مقصد نیں: چیف جسٹس نے اعلان کر دتا

اسلام آباد( پاکستان پوائنٹ نیوز14۔جولائی۔2018ء ) چیف جسٹس آف پاکستان جسٹس ثاقب نثار نے اپنی زندگی دے دو مقصداں بارے دس دتا۔ چیف جسٹس آف پاکستان نے آکھیا کہ میری زندگی دے دو ای مقصد نیں جیہناں وچ پہلا ڈیمز بنوانا تے دوجا اپنے ملک دا قرض لاہنا۔ میڈیا رپورٹ مطابق سپریم کورٹ وچ کچی آبادیاں بارے کیس دی سنوائی دوران چیف جسٹس پاکستان نے ریمارکس دتے کہ کچی آبادیاں وچ رہن والیاں نوں بُرے حالات دا ساہمنا اے۔

اوہناں نے آکھیا کہ کچی آبادیاں والے وی انسان نیں۔ میری زندگی دے دو ای مقصد نیں جیہناں وچ پہلا ڈیمز بنوانا تے دوجا اپنے ملک دا قرض لاہنا۔چیف جسٹس نے آکھیا کہ میں ریٹائرڈ ہو کے وی ایہدے اُتے کم جاری رکھاں گا۔ اوہناں نے ریمارکس دتے کہ اج ہر پیدا ہون والا بال اک لکھ 17ہزار رُپئے دا مقروض اے۔ اسیں اپنیاں پنج نسلاں نوں مقروض کر لیا اے۔ چیف جسٹس دا کہنا سی کہ اسیں آن والیاں نسلاں نوں مقروض چھڈ کے نہیں جانا، ڈیمز تے پانی والے مسئلے مگروں قرضیاں والا کم شروع کراں گے۔

چیتے رہوے کہ پاکستان بھر وچ ہر آؤندے دن نوں پانی دی کمی وچ وادھا ہو رہیا اے تے ایسے گل نوں مُکھ رکھدے ہوئے سپریم کورٹ نے 2ڈیمز بنان دا حکم جاری کیتا سی۔ پاکستان وچ ڈیمز دی اُساری(تعمیر) لئی آپ چیف جسٹس آف پاکستان جسٹس ثاقب نثار نے وی اپنی جیب وچوں 10لکھ رُپئے عطیہ دتا۔ ایس توں وکھ پاک فوج نے ڈیماں دی اُساری(تعمیر) وچ حصہ پان دا اعلان کیتا۔

آئی ایس پی آر مطابق تِنوں فوجاں دے سربراہ و افسر 2 جدکہ جوان اک دن دی تنخاہ کارخیر وچ جمع کروان گے۔ ترجمان پاک فوج میجر جنرل آصف غفور نے آکھیا کہ پاک فوج وی ڈیماں دی اُساری وچ اپنا حصہ ودھ کے پائے گی۔ پاک فوج دیامیر بھاشا ڈیم تے مہمند ڈیم دے فنڈز وچ حصہ قومی فرض سمجھدے ہوئے پائے گی۔ ایس توں وکھ پچھلے دیہاڑے سپریم کورٹ ولوں ڈیماں دی فنڈنگ لئی ایس ایم ایس دا آسان طریقہ کاروی متعارف کروا دتا گیا ، جیہدے تحت موبائل ورتیندڑ(صارف) میسج سروس راہیں 10رُپئے ڈیماں دی اُساری اکاؤنٹ وچ عطیہ کر سکدے نیں۔ سپریم کورٹ پریس ریلیز وچ بہت سادہ طریقہ دسیا گیا اے ، جیہدے تحت میسج وچ ’ڈیم‘ لکھو تے `8000`اُتے گھلو۔میسج گھلن دے کُجھ دیر مگروں تہانوں تصدیقی سنیہا وی مل جائے گا۔