لاہور( پاکستان پوائنٹ نیوز10۔جولائی۔2018ء ) مسلم لیگ (ن) دے قائد نواز شریف تے اوہناں دی دھی مریم نواز نے 13جولائی نوں ملک واپس آن دا اعلان کر دتا اے۔ پارٹی قائد و مریم نواز دی ملک واپسی نوں مُکھ رکھدے ہوئے مسلم لیگ (ن) دے کارکناں نے اوہناں دے استقبال دا فیصلا کیتا، تے ائر پورٹ اُتے استقبال دیاں تیاریاں وی شروع کر دتیاں نیں۔ دوجے پاسے پنجاب حکومت نے سابق وزیر اعظم نواز شریف دا استقبال روکن دا فیصلا کر لیا اے۔
میڈیا رپورٹس مطابق حکومت ولوں اک وڈا فیصلا ساہمنے آیا اے۔ پنجاب پولیس نے سابق وزیر اعظم نواز شریف دا ائر پورٹ اُتے استقبال روکن دا فیصلا کیتا اے۔ ایس حوالے نال پنجاب پولیس نوں ہدایت نامہ وی جاری کر دتا گیا اے کہ کسے صورت وی نواز شریف دا استقبال نہ ہون دتا جائے۔چیتے رہوے کہ جمعے دے دیہاڑے احتساب عدالت ولوں ایون فیلڈ ریفرنس کیس دا فیصلا سُنایا گیا ۔ فیصلے دے تحت سابق وزیر اعظم نواز شریف نوں 10، اوہناں دی دھی مریم نواز نوں 7تے داماد کیپٹن (ر) صفدر نوں اک سال قید دی سزا سُنائی گئی اے۔ نواز شریف نوں 10ملین پاؤنڈ تے مریم نواز نوں 2ملین پاؤنڈ جرمانہ وی کیتا گیا اے۔
