کراچی( پاکستان پوائنٹ نیوز10۔جولائی۔2018ء ) حبیب بنک لمیٹڈ نے ڈیمز دی اُساری لئی دس کروڑ رُپئے عطیہ دین دا اعلان کر دتا۔ چیف جسٹس، پاک فوج تے چیئرمین سینیٹ مگروں ہن حبیب بنک لمیٹڈ نے وی ڈیمز دی اُساری لئی عطیہ دین دا اعلان کیتا اے۔ کراچی وچ ڈپٹی گورنر سٹیٹ بنک شمس الحسن نے نیوز کانفرنس دوران آکھیاکہ پانی صرف اج دا نہیں بلکہ آن والیاں نسلاں دا وی مسئلا اے۔
آبی ذخائر کسے وی ملک لئی اہم نیں۔ اوہناں دا کہنا سی کہ ڈیم اُساری دے فنڈ دی اپ ڈیٹ آن لائن موجود اے۔ بنکاں دیاں 16ہزار شاخاں وچ فنڈ جمع ہو سکدے نیں۔ اوہناں نے آکھیا کہ اسیں فنڈ دی مدد وچ کوئی رکاوٹ نہیں آن دیواں گے۔ شمس الحسن نے دسیا کہ حبیب بنک لمیٹڈ نے ڈیمز فنڈ لئی 10کروڑ رُپئے دین دا اعلان کیتا اے۔ ایس توں وکھ پی بی ایل تے یو بی ایل دے ملازم وی اک دن دی تنخاہ فنڈ وچ دین گے۔
چیتے رہوے کہ ایس توں پچھلے دیہاڑے پاک فوج نے ڈیماں دی اُساری(تعمیر) وچ حصہ پان دا اعلان کیتا۔آئی ایس پی آر مطابق تِنوں فوجاں دے سربراہ و افسر 2 جدکہ جوان اک دن دی تنخاہ کارخیر وچ جمع کروان گے۔ ترجمان پاک فوج میجر جنرل آصف غفور نے آکھیا کہ پاک فوج وی ڈیماں دی اُساری وچ اپنا حصہ ودھ کے پائے گی۔ پاک فوج دیامیر بھاشا ڈیم تے مہمند ڈیم دے فنڈز وچ حصہ قومی فرض سمجھدے ہوئے پائے گی۔ ترجمان پاک فوج میجر جنرل آصف غفور نے آکھیاکہ تِناں فوجاں دے سربراہ و افسر دو دن جدکہ جوان اک دن دی تنخاہ ایس نیک مقصد لئی جمع کروان گے۔
