لاہور( پاکستان پوائنٹ نیوز09۔جولائی۔2018ء ) مسلم لیگ (ن) دے مرکزی رہنما خواجا سعد رفیق نے مرکزی جمعیت اہلحدیث دے سربراہ سینیٹر پروفیسر ساجد میر نال اوہناں دے دفتر وچ ملاقات کیتی، ایس موقعے تے ملک دی چالو(موجودہ) صورتحال، آؤندے الیکشن تے دو پاسی تعاون دے حوالے نال تفصیلی وچار وٹاندرا کیتا گیا۔ تفصیل مطابق مرکزی جمعیت اہلحدیث نے مسلم لیگ (ن) دی حمایت دا اعلان کر دتا اے۔
ایس موقعے تے پروفیسر ساجد میر نے آکھیا کہ مسلم لیگ (ن) دا ووٹ ونڈن لئی مذہبی جماعتاں نوں کھڑا کیتا جا رہیا اے۔ پر جمعیت اہلحدیث ملک بھر وچ مسلم لیگ (ن) نوں سپورٹ کرے گی۔ جمعیت اہلحدیث دے حامی (ن) لیگ دے امیدواراں نوں ووٹ دین۔ اسیں(ن) لیگ دا ووٹ ونڈن دے گیم دا حصہ نہیں۔ پنجاب وچ ایم ایم اے دا کوئی امیدوار جِتن دی پوزیشن وچ نہیں۔ ایس موقعے تے میڈیا نال گل بات کردے ہوئے مسلم لیگ (ن) دے رہنما خواجا سعد رفیق نے آکھیاکہ کارکن اپنے قائد دا استعمال کرن جا رہے نیں۔ مسلم لیگ (ن) نواز شریف دا پرامن استقبال کرے گی۔ نواز شریف دا استقبال کرنا ساڈا جمہوری حق اے۔ اوہناں نے آکھیا کہ پولیس یاں کسے نال جھیڑا نہیں چاہندے نہ ای کوئی ہلڑ بازی کیتی جائے گی۔
