اسلام آباد( پاکستان پوائنٹ نیوز09۔جولائی۔2018ء ) سعودی شاہی خاندان نے سابق وزیراعظم پاکستان نواز شریف نال تعلق ختم کر دتا اے۔ قومی اخبار وچ چھپن والی اک رپورٹ مطابق نواز شریف دیاں اوکڑاں وچ ہور وادھا ہو گیا اے۔ اوکڑاں وچ پھسے نواز شریف دے خاندان نے آخیر سعودی شاہی خاندان نال تعلق ختم کر لیا اے۔ رپورٹ وچ دسیا گیا کہ دوویں پاسیوں لمے چِر توں اک دوجے نال کوئی رابطہ نہیں کیتا گیا۔
رپورٹ وچ دسیا گیا کہ ایس وار سابق وزیراعظم نواز شریف روزیاں وچ سعودی عرب نہیں گئے۔ شریف خاندان نے اپنیاں ہمدردیاں راہیں سعودی شاہی خاندان نوں سنیہا گھلیا اے کہ بیتے ویلے وچ قطر یاں سعودی عرب وچوں کسے اک دا چناؤ(انتخاب) دا آپشن آپ سعودی قیادت نے بیان کیتا جو کہ بُہت دُکھ دی گل سی۔ ہن کیونکہ ایہ موقع آپ دتا گیا اے ، ایس لئی شریف خاندان قطری شاہی خاندان دا انتخاب کر رہیا اے۔
وسیلیاں نے دعوا کیتا کہ شریف خاندان ولوں سنیہا لیجان والے دوست ہن تیکر ایہ نواں بیانیہ اگانہ بیان کرن توں ہچکچا رہے نیں کہ کیتے سعودی عرب ساڈے نال وی تعلقات نہ توڑ دیوے۔ دوجے پاسے شریف خاندان ولوں سنیہا گھلیا گیا اے کہ ہن سعودی شاہی خاندان، عام انتخابات مگروں(ن) لیگ دی حکومت آن دی صورت وچ پاکستان دی نویں خارجا پالیسی لئی تیار رہوے جو کہ صرف اک ملک دی بجائے ’دوستی سب کے لیے‘ دے سلوگن اُتے ہوئے گی۔
تے ایس حوالے نال شام تے یمن اُتے سعودی عرب دی بجائے ترک پالیسی دا ساتھ دتا جائے گا۔ چیتے رہوے کہ ترکی شام تے یمن وچ سعودی عرب دی مداخلت دا ڈاڈھا مخالف اے۔ سیاسی مبصرین مطابق پاکستان نے قطری شاہی خاندان دا انتخاب ایس لئی وی کیتا کیونکہ قطری شہزادے نے پاناما کیس وچ اوہناں دی مدد کیتی سی ۔
