اسلام آباد( پاکستان پوائنٹ نیوز02۔جولائی2018ء ) پاکستان مسلم لیگ (ن) دے قائد و سابق وزیر اعظم نوا ز شریف تے اوہناں دی دھی مریم نواز نوں احتساب عدالت وچ پیشی توں ہور دو دن لئی استثنا مل گیا اے۔ میڈیا رپورٹس مطابق عدالت نے ایوان فیلڈ ریفرنس وچ نواز شریف تے مریم نواز دی دو دن لئی حاضری توں استثنا دی درخاست منظور کر لی اے۔ اسلام آباد دی احتساب عدالت وچ اج نواز شریف، مریم نواز تے کیپٹن (ر) صفدر خلاف نیب ریفرنسز دی سنوائی ہوئی۔
سنوائی دوران نواز شریف تے مریم نواز عدالت وچ پیش نہیں ہوئے پر اوہناں دے وکیل ولوں اوہناں دی حاضری توں استثنا دی درخاست کیتی گئی۔ درخاست وچ آکھیا گیا کہ نواز شریف دی گھر والی کلثوم نواز لندن وچ بیمار نیں۔ درخاست نال کلثوم نواز دی میڈیکل رپورٹ وی لائی گئی۔ عدالت وچ پیش کیتی گئی نواز شریف دی میڈیکل رپورٹ 27جون نوں تیار کیتی گئی سی جیہدے وچ آکھیا گیا کہ کلثوم نواز دی طبیعت پہلاں توں بہتر ہوئی اے پر اوہ اجے تیکر وینٹی لیٹر اُتے نیں تے اوہناں نوں وینٹی لیٹر توں ہٹان دا حتمی فیصلا نہیں ہویا۔
