اسلام آباد( پاکستان پوائنٹ نیوز29۔جون2018ء ) نجی ٹی وی دے پروگرام وچ گل بات کردے ہوئے مشہور پرچا کار عارف نظامی نے آکھیا کہ لاہور آن مگروں عمران خان دیاں ہور وی مصروفیات سن، عمران خان پاکپتن سویرے تن وجے گئے، تے ننگے پیریں گئے نیں۔ اوتھے اوہناں سجدہ وی کیتا کیونکہ عمران خان اوتھے عقیدت نال گئے۔عارف نظامی دا کہنا سی کہ عمران خان نے پاکپتن شریف وچ نفل وی پڑھے۔
ایس توں دو تاثر ملدے نیں، اک ایہ کہ محترمہ بشری بی بی کیونکہ پاکپتن دیاں متولی نیں تے پیدل وی آؤندیاں جاندیاں نیں، تے ہو سکدا اے کہ اوہ عمران خان نوں لے جا رہیاں ہون۔ بشری بی بی دی روحانیت پاروں ای عمران خان اوہناں توں متاثر ہوئے ، روحانیت مگروں ایہ رشتہ یکسانیت وچ بدل گیا تے فیر بشری بی بی اوہناں دی گھر والی بن گئی۔ اک تاثر تے ایہ وی اے کہ عمران خان واقعے تے حقیقت وچ عقیدت رکھدے نیں تے اوہ روحانیت وچ دلچسپی دی وجہ توں پاکپتن گئے تے اوہناں دی بیگم بشری بی بی ای اوہناں نوں اوتھے لے کے گئیاں پر دوجے پاسے ناقدین آکھ رہے نیں کہ پاکستانی لوکائی دی وڈی گنتی روحانیت تے پیراں فقیراں والے نظریے اُتے یقین رکھدی اے۔
عمران خان دی ایس حاضری نوں اوہناں دی سیاسی حکمت عملی وی آکھیا جا سکدا اے۔چیتے رہوے کہ پرسوں رات پی ٹی آئی چیئرمین عمران خان نے اپنی بیوی بشری بی بی نال مشہور پنجابی شاعر بابا فرید دے مزار اُتے حاضری دتی۔ عمران خان دی اپنی گھر والی نال حضرت بابا فرید گنج شکر دے مزار اُتے حاضری دین دی ویڈیو سوشل میڈیا اُتے وائرل ہوئی۔ اک پاسے جتھے عمران خان دی ایس حاضری نوں چنگے انداز نال ویکھیا گیا اوتھے دوجے پاسے کُجھ ورتیندڑ (صارف) پی ٹی آئی چیئرمین عمران خان اُتے تنقید وی کر رہے نیں۔
ایس معاملے اُتے گل بات کرد ے ہوئے مشہور مذہبی سکالر ڈاکٹر راغب نعیمی دا کہنا سی کہ اسیں کسے وی مسئلے نوں کسے فرد نال نہیں بلکہ شریعت دے مسئلے نوں کسے فرد دے ناں دے بغیر ای بیان کردے آں، کیونکہ ایہ ساریاں شیواں پہلے ای درباراں تے مزاراں اُتے ہوندیاں رہیاں نیں تے آؤندے ویلے وچ ہوندیاں رہن گیاں، ایس لئی ایہنوں کسے اک بندے نال جوڑنا بہتر نہیں ہوئے گا۔
اوہناں دا کہنا سی کہ جتھوں تیکر مزار وچ داخل ہون ویلے متھا ٹیکن یاں جُھکن دی گل آؤندی اے تے ایہنوں شریعت دی زبان وچ سجدہ تعظیمی آکھیا جاندا اے تے سجدہ تعظیمی زندہ انسان یاں کسے وی شے لئی ہوئے، شریعت نے ایس کم توں منع کیتا گیا اے تے ایہنوں حرام قرار دتا گیا اے۔ ایس حرام فعل نوں کرن والے نوں رب دی بارگاہ وچ توبہ کرنی چاہیدی۔ ایس بارے گل بات کردے ہوئے اک ہور مذہبی سکالر حامد سعید کاظمی نے آکھیا کہ سجدہ کرن دیاں دو صورتاں نیں، جے سجدہ تعظیمی کیتا گیا اے تے ایہ حرام اے پر جے سجدہ عبادت کیتا گیا اے تے ایہ شرک اے۔
خان صاحب دے حوالے نال میں ویکھیا اے کہ ایہدے وچ ایہ پتا نہیں لگ رہیا کہ خان صاحب نے مزار دی دہلیز اُتے سجدہ دتا یاں بوسہ کیتا اے۔ پر سجدہ کرنا جائز عمل نہیں اے۔ ایس حوالے نال قرآن و شریعت وچ کوئی دوجی رائے نہیں اے کہ اللہ دے سوا کسے نوں سجدہ کرنا جائز نہیں اے۔
