لاہور( پاکستان پوائنٹ نیوز26۔جون2018ء ) نگران صوبائی کابینہ پنجاب نے بجٹ دی منظوری دے دتی، بجٹ وچ تنخاہواں تے پنشن وچ 10فیصد وادھا کیتا گیا، نویں مال سال 2019-18دے چار مہینیاں دے ترقیاتی بجٹ دی منظوری دے دتی گئی اے۔ میڈیا رپورٹس مطابق نگران وزیر اعلا پنجاب ڈاکٹر حسن عسکری دی صدارت ہیٹھ اج صوبائی کابینہ دا اجلاس ہویا۔ وزیر اعلا آفس وچ ہون والے اجلاس دوران نویں مالی سال 2018-19دے چار مہینیاں دے بجٹ دی منظوری دے دتی گئی۔
اجلاس دوران سرکاری ملازماں دیاں تنخاہواں وچ 10فیصد وادھے دی تجویز نوں منظور کیتا گیا تے ہاؤس رینٹ وچ نظرثانی دی منظوری دتی گئی۔ اجلاس وچ (ر) سرکاری ملازماں دی پنشن وچ وی 10فیصد وادھے دی منظوری دتی گئی۔ نگران کابینہ نے نویں مالی سال 2018-19دے چار مہینیاں دے ترقیاتی بجٹ دی وی منظوری دتی ۔ اجلاس وچ نویں مالی سال 2018-19دے چار مہینیاں دے جاری خرچیاں دی منظوری دتی گئی۔
نگران وزیر اعلا پنجاب ڈاکٹر حسن عسکری نے اجلاس نال خطاب کردے ہوئے آکھیا کہ نگران حکومت نے نویں مالی سال برائے 2018-19لئی چار مہینیاں دا بجٹ پیش کیتا اے۔اوہناں دا کہنا سی کہ اسیں آئینی تقاضیاں نوں مُکھ رکھ کے بجٹ پیش کیتا اے۔ اسیں اپنے محدود مینڈینٹ تے آئینی ذمے واری دے اندر رہندے ہوئے بجٹ وچ لوکائی نوں ریلیف دین دی کوشش کیتی اے۔ تعلیم، صحت، زراعت تے سماجی شعبیاں لئی فنڈز وچ وادھا کیتا گیا اے۔ اسیں اپنے مینڈیٹ وچ رہ کے صوبے دی لوکائی دی خدمت کرنی اے۔ ڈاکٹر حسن عسکری نے آکھیا کہ سارے فیصلے کابینہ دی صلاح نال کیتے جا رہے نیں تے اج سانجھی رائے(اتفاق رائے) نال بجٹ منظور کیتا گیا۔ اجلاس وچ پنجاب ریونیو اتھارٹی دی کارکردگی نوں سلاہیا گیا۔
