لاہور( پاکستان پوائنٹ نیوز22۔جون2018ء ) عوامی مسلم لیگ دے سربراہ شیخ رشید اپنے چٹ پٹے بیانا ں دی وجہ توں ڈاڈھے مشہور نیں۔ پر شیخ رشید نے ہن تیکر ویاہ نہیں کیتا۔ شیخ رشید توں کئی وار سوال کیتا جاندا اے کہ اوہناں نے ویاہ کیوں نہیں کیتا جدکہ اوہناں نوں مخالفاں ولوں ویاہ نہ کرن اُتے تنقید دا نشانہ وی بنایا جاندا اے۔ اک نجی ٹی وی چینل نوں انٹرویو دیندے ہوئے عوامی مسلم لیگ دے سربراہ شیخ رشید نے ویاہ نہ کرن دی وجہ دس دتی۔
شیخ رشید دا کہنا سی کہ سچ پُچھو تے مینوں سیاست اینی پسند اے کہ مینوں ایہدے توں وکھ کُجھ ہور چنگا نہیں لگدا۔ شیخ رشید دا کہنا سی کہ میں کسے کُڑی نوں دھوکا نہیں دتا تے نہ ای مینوں کوئی فنی خرابی اے۔ میرے بارے دنیا بھر وچ جو بکواسیات ہو رہی اے۔ اوہ بلکل فضول اے۔ جے میں ویاہ کر لیندا تے اج ایتھے نہ ہوندا۔ میرے گھر وچ وی بہت مسئلے سن جیہناں نوں میں حل کیتا۔
ایس توں پہلاں وی جدوں اک وار شیخ رشید کولوں ویاہ بارے پُچھیا گیا تے اوہناں دا کہنا سی کہ میں ویاہ نہیں کیتا ایس لئی کرپشن توں بچیا ہویا واں کیونکہ بیویاں دا کرپشن وچ وڈا ہتھ ہوندا اے۔ مینوں کوئی مسئلا نہیں اے۔ اوہناں نے آکھیاکہ ویاہ دے حوالے نال میری ماں ہر ویلے روندیاں سن پر میری خاہش سی کہ میں خاندانی ذمے واریاں نبھاواں۔ خاندانی ذمے واریاں نبھان لئی کُجھ نہ کُجھ قربانی تے دیندی ای پیندی اے تے میں ویاہ والی قربانی کُھلے دل نال دتی۔
