اسلام آباد( پاکستان پوائنٹ نیوز22۔جون2018ء ) پاکستان وچ ائر پورٹس تے ائر لائنز دی حالت دُکھ بھری داستان اے۔ آئے دن پاکستانی ائر لائنز دی خراب کارکردگی دیاں خبراں ساہمنے آؤندیاں رہندیاں نیں۔ کدی مسافراں نوں کئی کئی گھنٹے ائر پورٹ اُتے جہاز نوں اُڈیکنا پیندا اے تے کدی اُڈان دوران مسافراں نوں مندا کھانا کھوایا جاندا اے،جیہدی وجہ توں مسافراں ڈاڈھے غصے وچ نظر آؤندے نیں تے کئی وار مسافر ائر لائنز دی خراب کارکردگی اُتے احتجاج وی کردے نیں۔
ایس حوالے نال اک ہور ویڈیو ساہمنے آئی اے جیہدے وچ کُجھ مسافر رلکے پاکستانی ائر لائن ائر بلیو دا جنازہ پڑھ رہے نیں۔تفصیل مطابق سوشل میڈیا اُتے اک ویڈیو وائرل ہو رہی اے جیہدے وچ کُجھ لوک ائر پورٹ اُتے جنازہ پڑھ رہے نیں۔ پر حیرت دی گل ایہ اے کہ جنازہ کسے انسان دا نہیں بلکہ اک ائر لائن دا اے۔ میڈیا رپورٹس مطابق ائر بلیو دے مالک پاکستان دے سابق وزیر اعظم شاہد خاقان عباسی نیں، جو اپنی ائر لائن دی حالت نوں ای بہتر نہیں بنا سکے۔
ایس لئی کُجھ مسافراں نے ایس ائر لائن دی نمازہ جنازہ پڑھی۔ مسافراں نے ایس موقعے تے غصے دا وکھالا کیتا۔ مسافراں دا کہنا سی کہ سانوں ایتھے کئی کئی گھنٹے جہازاں نوں اُڈیکنا پیندا اے۔ اسیں ائر پورٹ اُتے ذلیل ہوندے رہندے آں ایس لئی اج اسیں ائر بلیو دا جنازہ پڑھا رہے آں۔
