راولپنڈی( پاکستان پوائنٹ نیوز15۔جون2018ء ) آرمی چیف جنرل قمر جاوید باجوہ نے سابق وزیر اعظم نواز شریف تے اوہناں دے خاندان نوں سنیہا (پیغام) گھلیا اے۔ اپنے سنیہے وچ آرمی چیف نے بیگم کلثوم نواز دی صحت یابی تے اوہناں لئی نیک خاہشاں دا اظہار کیتا اے۔ آئی ایس پی آر مطابق آرمی چیف نے بیگم کلثوم نواز دی چھیتی تندرستی لئی سابق وزیراعظم نواز شریف نوں نیک خاہشاں دا پیغام گھلیا اے۔
دوجے پاسے مشہور سیاسی شخصیتاں عمران خان، آصف علی زرداری،خورشید شاہ تے ہور رہنماواں ولوں کلثوم نواز لئی نیک خاہشاں دا اظہار کیتا گیا اے۔ ایس بارے چیئرمین پی ٹی آئی عمران خان نے ٹویٹ کردے ہوئے لکھیا اے کہ ساڈیاں ساریاں دعاواں کلثوم نواز نال نیں۔ رب اوہناں نوں تندرستی دیوے۔ چیتے رہوے کہ بیگم کلثوم نواز نوں پچھلے دیہاڑے ہارٹ اٹیک ہویا سی ،جیہدے مگروں اوہناں دی حالت بُہتی خراب ہو گئی سی۔ خاندانی وسیلیاں مطابق بیگم کلثوم نواز نوں آئی سی یو وچ وینٹی لیٹر اُتے منتقل کر دتا گیا سی۔
