اسلام آباد( پاکستان پوائنٹ نیوز15۔جون2018ء ) سپریم کورٹ نے سابق صدر پرویز مشرف نوں پاکستان واپس آن دی صورت وچ تحفظ دین تے پرویز مشرف نوں الیکشن لڑن دی اجازت دتی سی۔ پر پرویز مشرف عدالت وچ پیش نہ ہوئے جیہدے مگروں سپریم کورٹ نے سابق صدر پرویز مشرف دے کاغذات نامزدگی جمع کروان دا عبوری حکم واپس لے لیا سی۔ ایس بارے گل بات کردے ہوئے راجا عامر عباس دا کہنا سی کہ سپریم کورٹ نے مشرف نوں اینی سہولت دتی کہ اوہناں نوں ائر پورٹ توں عدالت تیکر گرفتار نہیں کیتا جائے گا ، اوہ عدالت آن تے اپنے مقدمیاں دا ساہمنا کرن پر پرویز مشرف پاکستان نہیں آئے کیونکہ پرویز مشرف چاہندے سن کہ ایس ویلے اوہناں اُتے جِنے وی مقدمے نیں اوہناں وچ ضمانت دتی جائے تے سارے مقدمیاں وچ ضمانت ہون مگروں اوہ پاکستان آن۔
اوہناں دا کہنا سی کہ مشرف صاحب سمجھدے سن کہ اوہ پریشر پا کے شاید کوئی ڈیل کروان وچ کامیاب ہو جان۔ نال ای مشرف نے ایہ وی سوچیا کہ ہن الیکشن وچ کُجھ دن ای رہ گئے نیں تے پاکستان آن دا کوئی فائدہ نہیں ہوئے گا کیونکہ اینے گھٹ دناں وچ اوہ الیکشن لئی کوئی خاص مہم وی نہیں چلا سکن گے۔ ایس لئی اوہناں نے اجے پاکستان توں باہر رہن دا ای فیصلا کیتا اے۔ چیتے رہوے کہ سپریم کورٹ لاہور رجسٹری وچ سابق صدر پرویز مشرف دے وکیل نے سنوائی دوران د سیا کہ پرویز مشرف واپس نہیں آ رہے۔ وکیل نے آکھیا کہ پرویز مشرف وطن واپس آنا چاہندے نیں پر چالو(موجودہ) حالات تے چھٹیاں دی وجہ توں نہیں آ رہے۔ جیہدے اُتے سپریم کورٹ نے سابق صدر پرویز مشرف دے کاغذات نامزدگی دا عبوری حکم واپس لے لیا۔
