کراچی( پاکستان پوائنٹ نیوز15۔جون2018ء ) مشہور پرچا کار عارف نظامی دا کہنا اے کہ کراچی وچ عمران خان دے مقابلے وچ شہلا رضا دے جِتن دی بُہتی آس اے۔ تفصیل مطابق پاکستان پیپلز پارٹی ولوں جاری اعلامیے مطابق عام انتخابات لئی سندھ دیاں قومی و صوبائی اسمبلی دیاں 160سیٹاں لئی ٹکٹ جاری کر دتے گئے نیں۔ پیپلز پارٹی نے کراچی دے حلقہ این اے 243گلشن اقبال توں عمران خان دے مقابلے وچ شہلا رضا نوں ٹکٹ دتا اے۔
ایس بارے جدوں شہلا رضا توں پُچھیا گیا کہ عائشہ گلا لئی عمران خان خلاف الیکشن لڑ رہیاں نیں،ایہدی وجہ سمجھ آؤندی اے کہ اوہناں دی عمران خان نال کیہ دشمنی اے پر تُسیں عمران خان خلاف ای الیکشن کیوں لڑنا چاہندے او؟جیہدے جواب وچ شہلا رضا دا کہنا سی کہ میں عمران خان خلاف ایس لئی الیکشن لڑ رہی آں کہ مینوں لگدا اے کہ میں اوہناں خلا ف الیکشن لڑ سکدی آں۔
تے میرے خیال وچ عمران خان میرے خلاف الیکشن لڑ رہے نیں۔ایس موقعے تے عارف نظامی دا کہنا اے کہ مینوں لگدا اے کہ عمران خان دے مقابلے وچ تُہاڈے جِتن دے چانسز بُہتے نیں۔ چیتے رہوے کہ ملک بھر وچ 25جولائی نوں عام انتخابات دا اعلان کیتا گیا اے۔ملک بھر وچ الیکشن پاک فوج دی نگرانی وچ ہون گے۔ سکیورٹی خدشیاں نوں مُکھ رکھدے ہوئے سکیورٹی فورسز 22جولائی ایتوار دے دیہاڑے ای اپنیاں ذمے واریاں سنبھال لین گیاں۔ پنجاب وچ چھ ہزار پولنگ سٹیشن حساس قرار دتے گئے نیں۔ پنجاب سنے ملک بھر چوں حساس پولنگ سٹیشناں اُتے کلوز سرکٹ کیمرے وی لائے جان گے۔ الیکشن دوران سکیورٹی دے حوالے نال خاص انتظامات کیتے جان گے۔
