اسلام آباد( پاکستان پوائنٹ نیوز15۔جون2018ء ) سابق وزیر داخلا چودھری نثار علی خان تے شریف برادران دا 35ورھیاں دا تعلق ہُن ختم ہوندا وکھالی دے رہیا اے۔ شریف برادران تے چودھری نثار علی خان وچکار لمے چِر توں اختلافات چل رہے نیں تے ایہ وی خبراں آ رہیاں سن کہ چودھری نثار علی خان تحریک انصاف وچ رلتی ہو جان گے۔ پر چودھری نثار علی خان نے الیکشن وچ حصہ لین لئی آزاد امیدوار دے طور اُتے کاغذات نامزدگی جمع کروا دتے نیں۔
جتھے چودھری نثار علی خان نوں پاکستان مسلم لیگ (ن) دے کُجھ رہنماواں ولوں مخالفت دا ساہمنا اے اوتھے کُجھ ایس طرحاں دے رہنما وی نیں جو اجے وی ایہ سمجھدے نیں کہ چودھری نثار علی خان (ن) لیگ دی ضرورت اے۔ ایس بارے سابق وزیر ریلوے خواجا سعد رفیق نے وی ٹویٹ کردے ہوئے آکھیا اے کہ چودھری نثار علی خان دا معاملا سِدھا ہوندا ہوندا وِگڑ گیا اے۔ کاش انج نہ ہوندا۔
اسیں ایہ نہیں چاہندے سی پر ہن انج ہو گیا اے۔ ۔چیتے رہوے کہ پاناما کیس وچ نواز شریف دی نااہلی مگروں مسلم لیگ (ن) دی سیاست دا کالا دور شروع ہویا۔ مسلم لیگ (ن) دی ساکھ اودوں خطرے وچ پئی جدوں پارٹی دے قائد نواز شریف نے عدلیہ، نیب تے پاک فوج سنے ملکی اداریاں نوں تنقید دا نشانہ بنانا شروع کیتا۔ انج دے ماحول وچ پارٹی دے سینئر رہنماواں نے وی نواز شریف توں پچھانہ ہٹن دا فیصلا کیتا۔ ایس ساری صورتحال وچ چودھری نثار علی خان پہلے تے چُپ رہے پر فیر اوہناں نے وی میڈیا کانفرنس، نیوز کانفرنس تے پرچا کاراں نال گل بات دوران پارٹی پالیسیاں دی مخالف کیتی۔
