اسلام آباد( پاکستان پوائنٹ نیوز12۔جون2018ء ) محکمہ موسمیات نے گرمی دے ستائے شہریاں نوں نِکی عید دے حوالے نال چنگی خبر سُنا دتی۔ میڈیا رپورٹ مطابق محکمہ موسمیات دا کہنا اے کہ نِکی عید دے دناں وچ ملک بھر وچ پری مون سون بارشاں دا سلسلا شروع ہو جائے گا تے درجہ حرارت وچ کمی ویکھن نوں ملے گی۔ محکمہ موسمیات دا کہنا اے کہ بارشاں دا سلسلا 19جون تیکر جاری رہوے گا جدکہ بارشاں دا دوجا سلسلا 22جون توں 24جون تیکر رہن دا امکان اے۔
محکمہ موسمیات دا کہنا ا ے کہ بارشاں دی شروعات نِکی عید دے دناں وچ ہوئے گی ،جیہدے نتیجے وچ موسم وچ کُجھ بہتری آئے گی۔دوجے پاسے ایس توں پہلاں محکمہ موسمیات دے ترجمان خالد محمود نے پیشنگوئی کیتی سی کہ آن والے ہفتیاں وچ جڑواں شہراں سنے ملک بھر وچ درجہ حرارت وچ وادھا ہوئے گا۔ اوہناں دا کہنا سی کہ چالو ورھے مئی دے مہینے وچ موہنجوداڑو، جیکب آباد، دادو تے تربت وچ سبھ توں ودھ درجہ حرارت 51ڈگری سینٹی گریڈ جدکہ لاڑکانہ تے سکھر وچ درجہ حرارت 50ڈگری سینٹی گریڈ ریکارڈ کیتا گیا۔ اوہناں دا کہنا سی کہ درجہ حرارت وچ فرق دی وجہ توں جون دے وچکار ملک بھر وچ پری مون سون دا سلسلا شروع ہون دی آس اے،جیہدے مگروں موسم سوہنا تے درجہ حرارت وچ کمی ہو جائے گی۔
