پی ٹی آئی نے کُڑیاں اغوا کرن والے سابق گورنر پنجاب نوں ٹکٹ دے دتا

پی ٹی آئی نے کُڑیاں اغوا کرن والے سابق گورنر پنجاب نوں ٹکٹ دے دتا

لاہور( پاکستان پوائنٹ نیوز12۔جون2018ء ) ٹکٹاں ونڈن دے حوالے نال پاکستان تحریک انصاف و عمران خان نوں ڈاڈھی تنقید دا نشانہ بنایا جا رہیا اے۔ نقاداں ولوں آکھیا جا رہیا اے کہ عمران خان نے اپنے نظریاتی کارکناں نوں اہمیت دین دی بجائے منتخب امیدواراں نوں ٹکٹ دتے نیں۔ جیہدے وچوں کئی رہنما خطرناک جُرماں وچ ملوث رہے نیں۔ ایس بارے گل بات کردے ہوئے مشہور پرچا کار رؤف کلاسرا دا کہنا سی کہ عمران خان نے نوجواناں نوں استعمال کیتا تے اوہناں دے خاب توڑے نیں۔ عمران خان نے مصطفی کھر نوں ٹکٹ دتا۔ مصطفی کھر نے آخری وار الیکشن 1993وچ جِتیا سی۔ مصطفی کھر اُتے خطرناک قسم دے الزام نیں۔ سینئر سیاست دان جاوید ہاشمی نے اپنی کتاب ’ہاں میں باغی ہوں‘ وچ مصطفی کھر اُتے بہت وڈا الزام لایا سی کہ مصطفی کھر جدوں گورنر سی ، اوہناں نے سمن آباد توں کُڑیاں اغوا کروائیاں سن۔ جیہدے مگروں ایہناں کُڑیاں نوں گورنر ہاؤس لیاندا گیا۔ جاوید ہاشمی دا کہنا اے کہ میں اوس ویلے پنجاب یونیورسٹی وچ پڑھدا سی ، مینوں جدوں ایس بارے پتا لگا تے اسیں یونیورسٹی توں نکلے تے گورنر ہاؤس نوں چارے پاسیوں گھیر لیا۔آخیر کئی اوکڑاں(مشکلات) مگروں اوہناں کُڑیاں نوں رہا کروایا ۔ جاوید ہاشمی نے اپنی کتاب و چ ایہ وی لکھیا اے کہ پتا نہیں مصطفی کھر اینی جائیداد دے مالک کیویں بن گئے۔ مصطفی کھر کول لندن وچ سردیاں وچ کوٹ خریدن لئی پیسے نہیں ہوندے سن جدکہ مصطفی کھر اُتے ایہ وی الزام لایا اے کہ اوہناں نے 1990وچ اصغر خان کیس وچ 20لکھ رُپئے لئے سن۔ایس توں وکھ بریگیڈیئر امتیاز نے مصطفی کھر اُتے الزام لایا کہ 50لکھ رُپئے تے مصطفی نے ساڈے کولوں لئے ۔ رؤف کلاسردا کہنا سی کہ ایس لئی مینوں لگدا اے کہ عمران خان نے پڑھے لکھے لوکاں نوں نظر انداز کیتا تے اوہناں دے خاب توڑے۔