اسلام آباد( پاکستان پوائنٹ نیوز09۔جون2018ء ) پی ٹی آئی ولوں خیبرپختونخوا وچ صوبائی اسمبلی دے 81امیدوار، سندھ اسمبلی دے اجے 21حلقیاں، بلوچستان اسمبلی دے 23حلقیاں تے پنجاب دے 165حلقیاں لئی انتخابی امیدواراں نوں ٹکٹ جاری کیتا گیا۔ کئی انتخابی امیدواراں نے پارٹی ولوں ٹکٹ نہ ملن اُتے سخت ردعمل دا اظہار وی کیتا۔ناقداں تے رُس جان والے کارکناں دا کہنا اے کہ پی ٹی آئی نے اپنے اہم تے موڈھی رہنماواں نوں نظر انداز کر کے نویں پارٹی وچ رلتی ہون والے سیاسی رہنماواں نوں ٹکٹ جاری کیتے جو پارٹی دے نظریاتی رہنماواں نال زیادتی اے۔
قومی اخبار وچ چھپن والی اک رپورٹ مطابق پاکستان تحریک انصاف نے کئی حلقیاں وچ پیو پُتر، بھتیجے، سگے بھراواں تے رشتے داراں نوں وی کٹ نال نواز دتا۔ قومی اسمبلی دے حلقہ این اے 101توں ذوالقرنین ساہی نال صوبائی حلقے پی پی 97توں علی افضل ساہی تے اوہناں دے والد افضل ساہی نوں پی پی 99توں، چودھری علی اختر خان جدکہ وڈے بھرا چودھری ظہیر الدین خان نوں پی پی 100توں ، ایسے طرحاں سردار دلدار احمد چیمہ نوں قومی اسمبلی دے حلقہ این اے 104جدکہ اوہناں دے پُتر دلنواز چیمہ نوں صوبائی حلقہ پی پی 106توں ٹکٹ جاری کیتا گیا اے۔
ایہو نہیں بلکہ پارٹی دے وائس چیئرمین شاہ محمود قریشی وی اپنے پُتر نوں پارٹی ٹکٹ دوان وچ کامیاب رہے۔ پی ٹی آئی جو خاندانی سیاست دی ہمیشہ مخالفت کردی آئی اے ہن اوہ آپے ای خاندانی سیاست نوں فروغ وی دے رہی اے۔ رشتے داراں نوں ٹکٹ دین دے معاملے اُتے پی ٹی آئی نوں ڈاڈھی تنقید دا نشانہ بنایا جا رہی اے۔ پی ٹی آئی نے اپنی انتخابی لسٹ وچ ویکھن نوں اپنے اہم رہنماواں علی محمد خان، شوکت یوسفزئی تے شہریار آفریدی نوں وی ٹکٹ جاری نہیں کیتا۔
فردوس عاشق اعوان، بابر اعوان ، فیصل واڈا، ڈاکٹر عامر لیاقت، سیف اللہ نیازی تے ولید اقبال نوں وی ٹکٹ نہیں دتا گیا۔ پی ٹی آئی دے ناراض کارکناں نے گرینڈ الائنس دے ناں توں اک اتحاد بنایا لیا اے، جیہدے وچ مردان توں تعلق رکھن والے کارکن وی شامل نیں، ایس گرینڈ الائنس دے ناراض کارکن پی ٹی آئی چیئرمین عمران خان دے گھر بنی گالا باہر احتجاج کرن گے۔
