اسلام آباد( پاکستان پوائنٹ نیوز09۔جون2018ء ) چیف جسٹس پاکستان میاں ثاقب نثار نے کالا باغ ڈیم بنان بارے درخاست دی سنوائی دوران ریمارکس دتے نیں کہ ہن سپریم کورٹ ڈیمز بنان بارے اگانہ ودھ کے اپنا کردار نبھائے گی، ایس ویلے پاکستان وچ بحث کالا باغ ڈیم دی نہیں کر رہے، اسیں ایہ ویکھ رہے آں کہ پانی دی کمی کیویں ختم ہوئے گی، پتا اے آؤندے ویلے نوں پانی دی اہمیت کیہ ہوئے گی؟پر چار بھرا جیہدے اُتے راضی نہیں تے فیر متبادل کیہ اے؟پانی دی کمی دے خاتمے دا تہیہ کر لیا اے، اسیں اک ٹیم بنا دینے آں جیہدے وچ اعتزاز احسن تے ہور ماہراں دیاں خدمتاں لواں گے، عید مگروں سپریم کورٹ دا لاء اینڈ جسٹس ڈیپارٹمنٹ سیمینار کروائے گا، ماہرین تجویزاں دین بِہ کے ایس او پیز بناواں گے، دسیا جائے ملک وچ ڈیمز کس طرحاں بنائے جان، سفارشاں دتیاں جان اسیں پارلیمنٹ نوں سفارش کراں گے۔
سابق چیئرمین واپڈ ظفر محمود نے عدالت نوں د سیا کہ کالا باغ ڈیم بنان اُتے لوکاں نوں پوری آگاہی نہیں، ایس جھیڑے مگروں واپڈ دی چیئرمین شپ توں استعفا دتا سی، بھارت نے راوی، ستلج تے بیاس دے پانی اُتے قبضہ کر لیا اے، انڈس واٹر سمجھوتے توں وی خطرے پیدا ہو گئے نیں، ہڑھ آن مگروں بھارت پانی چھڈ سکدا اے، بھارت دے ڈیمز وچ تکنیکی طور اُتے بُہتا پانی جمع کیتا جا سکد ااے۔
ظفر محمود نے عدالتی کمرے وچ پروجیکٹر راہیں کالا باغ ڈیم اُتے بریفنگ وی دتی۔ ہفتے نوں سپریم کورٹ کراچی رجسٹری وچ چیف جسٹس پاکستان دی سربراہی لارجر بنچ نے کالا باغ ڈیم بنان بارے بیرسٹر ظفر اللہ خان ولوں دائر درخاست دی سنوائی کیتی۔ سنوائی دوران چیف جسٹس نے ریمارکس دتے کہ ہن سپریم کورٹ ڈیمز بنان بارے اگانہ ودھ کے اپنا کردار نبھائے گی۔
ایس ویلے پاکستان وچ بحث کالا باغ ڈیم دی نہیں کر رہے۔ اسیں ایہ ویکھ رہے آں کہ پانی دی کمی کیویں ختم ہوئے گی، پتا اے آؤندے ویلے نوں پانی دی اہمیت کیہ ہوئے گی؟پر چار بھرا جیہدے اُتے راضی نہیں تے فیر متبادل کیہ اے؟پانی دی کمی دے خاتمے دا تہیہ کر لیا اے، اسیں اک ٹیم بنا دینے آں جیہدے وچ اعتزاز احسن تے ہور ماہراں دیاں خدمتاں لواں گے۔چیف جسٹس دا کہنا سی کہ عید مگروں سپریم کورٹ دا لاء اینڈ جسٹس ڈیپارٹمنٹ سیمینار کروائے گا، ماہرین تجویزاں دین بِہ کے ایس او پیز بناواں گے۔
اوہناں دا کہنا سی کہ دسیا جائے ملک وچ ڈیمز کس طرحاں بنائے جان، سفارشاں دتیاں جان اسیں پارلیمنٹ نوں سفارش کراں گے۔ چیف جسٹس میاں ثاقب نثار نے آکھیا کہ قانون بنان دی صلاحت ملک وچ ختم ہو گئی اے، لاء اینڈ جسٹس کمیشن راہیں قانون بنا کے پارلیمنٹ نوں سفارش کیتی جا سکدی اے، قوم اختیار دیوے تے سپریم کورٹ اپنا کردار ادا کرن نوں تیار اے۔ چیف جسٹس نے آکھیا کہ سانوں خودنمائی کرن والے لوک نہیں چاہیدے۔
