لاہور( پاکستان پوائنٹ نیوز08۔جون2018ء ) پنجاب دے سرکاری ملازماں لئی بُری خبر اے کہ اوہناں نوں نکی عید دے موقعے تے ایڈوانس تنخاہ نہیں ملے گی۔ میڈیا رپورٹ مطابق پنجاب دے سرکاری ملازماں نوں نکی عید دے موقعے اُتے ایڈوانس تنخاہ دین دا معاملا نگران وزیر اعلا حسن عسکری ساہمنے پیش کیتا جائے گا۔ نگران وزیر اعلا نے معاملے دی منظوری دتی تے فیر ای سرکاری افسراں و ملازماں نوں نکی عید دی ایڈوانس تنخاہ مل سکے گی۔
ایس توں پہلاں نکی دیاں چھٹیاں دا اعلان 14جون توں 18جون تیکر کیتا جا رہیا اے۔ جیہدی وجہ توں ایڈوانس تنخاہ دی ادائیگی مشکل قرار دتی جا رہی اے۔ محکمہ خزانہ دا کہنا اے کہ قانون مطابق عید 20تاریخ مگروں ہوئے تے تنخاہ ایڈوانس ہو سکے گی پر ایس سال کیونکہ عید 20تاریخ توں پہلاں اے ایس لئی سرکاری افسراں و ملازماں نوں تنخاہ ویلے توں پہلاں دینا مشکل اے۔
دوجے پاسے حکام دا کہنا اے کہ پنجاب وچ ہن الیکشن 2018دے حوالے نال نگران حکومت آ گئی اے پر جے ایڈوانس تنخاہ دی ادائیگی دے معاملے اُتے نگران حکومت منظوری دے دیوے تاں ایڈوانس تنخاہ جاری کیتی جا سکدی اے۔ وسیلیاں مطابق پنجاب وچ تنخاہواں دی مد وچ مہینہ 25ارب رُپئے جاری کیتے جاندے نیں، پر مالیاتی کسارے(خسارے) تے نگران سیٹ اپ دے تحت مالی بحران وی اے۔
