مری دے دُکانداراں دی عقل ٹھکانے آ گئی

مری( پاکستان پوائنٹ نیوز07۔جون2018ء ) مری وچ سیاحاں نوں تشدد دا نشانہ بنان تے ہراساں کیتے جان دے کئی واقعیاں مگروں سوشل میڈیا اُتے مری بائیکاٹ مہم شروع ہوئی سی۔ جیہدے بعد ڈرے ہوئے سیاحاں نے سیر سپاٹے لئی مری دی بجائے ہور تفریحی تھاواں ول جان نوں ترجیح دینا شروع کر دتی۔ مری بائیکاٹ مہم دے تحت کئی ریلیاں وی کڈھیاں گئیاں جیہناں وچ رلتی لوکاں نے ہتھاں وچ پلے کارڈز چُکے ہوئے سن جیہناں اُتے لکھیا گیا سی کہ مری وچ اسیں تے ساڈے بال محفوظ نہیں نیں۔ ایہدے نال نال سیاحاں نوں عزت دو دے پلے کارڈز وی ویکھن نوں ملے۔ مری دے دُکاندراں بارے وی رپورٹس ساہمنے آئیاں کہ اوہناں نے قیمتاں وچ کئی گنا وادھا کیتا ہویا اے جو سیاحاں ولوں مری دا بائیکاٹ کرن دی وڈی وجہ سی۔پر ہن سوشل میڈیا اُتے مری دے اک دُکاندار دی ویڈیو وائرل ہوئی اے۔ ویڈیو وچ دُکاندار سیاحاں نوں مخاطب کردے ہوئے آکھ رہیا اے کہ خدا لئی مری آ جاؤ!ساڈے کول گاہک نہیں آؤندا، اسیں دُکاناں دے کرائے وی دینے نیں، کوئی آمدن نہیں اے، دُکاناں دا کرایہ دینا مشکل ہو گیا اے۔ ایس ویڈیو وچ جون دے مہینے دوران مری دی ویران مارکیٹ دا نظارہ وی ویکھیا گیا۔ سوشل میڈیا اُتے وائرل ہوئی ویڈیو تُسیں وی ویکھو!