اسلام آباد( پاکستان پوائنٹ نیوز07۔جون2018ء ) سپریم کورٹ نے سابق صدر پرویز مشرف نوں انتخابات لئی کاغذات نامزدگی جمع کروان دی مشروط اجازت دے دتی۔ تفصیل مطابق عام انتخابات وچ کاغذات نامزدگی جمع تے وصول کرن دا سلسلا جاری اے۔ سپریم کورٹ وچ پرویز مشرف نااہلی کیس دی سنوائی ہوئی۔ چیف جسٹس پاکستان دی سربراہی وچ تن رکنی بنچ نے سابق صدر پرویز مشرف دی تاحیات نااہلی خلاف درخاست دی سنوائی کیتی۔
چیف جسٹس نے پرویز مشرف دے وکیل نوں آکھیا کہ تہاڈے کیس نوں سُناں گے، اپنے موکل نوں آکھو 13جون نوں لاہور آ جائے۔ سنوائی دوران چیف جسٹس میاں ثاقب نثار دا کہنا سی کہ پرویز مشرف میرے ساہمنے پیش ہو جان اوہناں نوں گرفتار نہیں کیتا جائے گا۔ اسیں حکم دے دیواں گے کہ پرویز مشرف نوں عدالت اپڑن تیکر گرفتار نہ کیتا جائے۔ عدالت وچ پرویز مشرف دے وکیل دا کہنا سی کہ موکل دے کاغذات نامزدگی دی وصولی دا معاملا اے۔
ایس دوران چیف جسٹس نے ریمارکس دتے کہ اسیں سادہ حکم دتا اے کہ پرویز مشرف لاہور آ جاؤ۔ ریٹرننگ افسر نوں کاغذات نامزدگی وصول کرن دا آکھ دیواں گے۔ درخاست دے حتمی فیصلے نال اوہناں دا انتخاب لڑنا مشروط ہو ئے گا۔ جسٹس ثاقب نثار نے سابق صدر دے وکیل نوں آکھیا کہ پرویز مشرف پاکستان آجان تے کیس دی تفصیل نال سنوائی کیتی جائے گی۔ دوجے پاسے میڈیا رپورٹ مطابق آل پاکستان مسلم لیگ دے سربراہ و سابق صدر جنرل (ر) پرویز مشرف نے نِکی عید مگروں واپسی دا فیصلا کر لیا اے۔حتمی تاریخ دا اعلان نااہلی خلاف اپیل وچ سپریم کورٹ دے فیصلے مگروں ہوئے گا۔
