اسلام آباد( پاکستان پوائنٹ نیوز05۔جون2018ء ) چیف جسٹس پاکستان نے خدیجہ اُتے تشدد کرن والے ملزم دی رہائی دا نوٹس لے لیا۔ تفصیل مطابق لاہور توں تعلق رکھن والی قانون دی پڑھیارن خدیجہ صدیقی اُتے 23وار چھریاں دا وار کرن والے شاہ حسین نوں پچھلے دیہاڑے لاہور ہائی کورٹ نے بری کر دتا سی۔ خدیجہ صدیقی اُتے حملا کرن والے ملزم شاہ حسین نوں ایس توں پہلاں سیشن کورٹ ولوں 7سال قید دی سزا سُنائی گئی سی۔
پر پچھلے دیہاڑے لاہور ہائی کورٹ نے اپنی ہم جماعت اُتے خنجر دے 23وار کرن والے ملزم نوں بری کر دتا۔ شاہ حسین نے اپنی سزا خلاف لاہور ہائی کورٹ وچ اپیل دائر کیتی سی۔چیتے رہوے کہ 2سال پہلے لاہور وچ قانون دی پڑھیارن خدیجہ صدیقی اُتے اوہدے ہم جماعت شاہ حسین نے حملا کیتا سی۔ ملزم نے خدیجہ دی نِکی بھین ساہمنے خنجراں نال حملا کیتا۔ مجرم نے خدیجہ اُتے خنجر نال 23وار کیتے ،جیہدے نتیجے وچ خدیجہ ڈاڈھی زخمی ہوئی گئی سی پر ایس حملے وچ اوہدی جان بچ گئی۔
جیہدے مگروں اوہنے وڈیرے دے پُتر خلاف قانونی جنگ لڑن دا فیصلا کیتا ۔عدالتوں آخیر اوہدی فتح ہوئی تے 29جولائی 2017نوں سوا سال مگروں ملزم شاہ حسین اپنے انجام نوں اپڑ گیا۔مقامی عدالت نے خدیجہ صدیقی کیس وچ مجرم شاہ حسین نوں ست سال قید دی سزا سُنائی۔ عدالت نے شاہ حسین نوں کمرہ عدالت توں گرفتارن کرن دا حکم دتا۔ پر فیصلے خلاف ملزم نے اپیل دائر کیتی، جیہدافیصلا کل ہویا۔
