لاہور( پاکستان پوائنٹ نیوز02۔جون2018ء ) سابق سپیکر قومی اسمبلی سردار ایاز صادق نے پارلیمنٹ دی قانون سازی خلاف درخاست دائر کرن دا فیصلا کرلیا، میری ذمے واری بندی اے کہ ایس فیصلے خلاف درخاست دائر کراں، 25مئی نوں اسلام آباد ہائی کورٹ نے درخاست نوں رد کیتا، الیکشن شیڈول دے اعلان مگروں فیصلا آن دا کیہ مقصد اے؟اوہناں نے اج میڈیا نال گل بات کردے ہوئے آکھیا کہ میری ذمے واری بندی اے کہ فارم وچ تبدیلی لیان دے فیصلے خلاف عدالت جاواں۔
اوہناں نے آکھیا کہ 25مئی نوں اسلام آباد ہائی کورٹ وچ ای فارم خلاف پٹیشن دائر کیتی گئی سی ۔ پرعدالت نے ایس پٹیشن نوں رد کر دتا سی۔ اوہناں نے آکھیا کہ سینیٹ دے الیکشن وی ایسے ایکٹ دے تحت ہوئے نیں جیہدے تحت کاغذات نامزدگی فارم بنیا سی۔ساریاں جماعتاں نے ایس بارے اکو فیصلا کیتا سی۔ سردار ایاز صادق نے آکھیا کہ الیکشن شیڈول دے اعلان مگروں فیصلا آن دا کیہ مقصد اے؟۔
تحریک انصاف نوں تنقید دا نشانہ بناندے ہوئے اوہناں دا کہنا سی کہ نگران حکومت دے فیصلے سکون نال کیتے جاندے نیں۔ تحریک انصاف دے دتے گئے ناں منظور کیتے گئے۔ تحریک انصاف نے فیصلے پیری مریدی نال کروائے نیں یاں سوشل میڈیا توں؟تحریک انصاف والے کنفیوژن دا شکار نیں۔ اوہناں نے آکھیا کہ نگران وزیراعظم دے ناں اُتے کوئی تنقید نہیں ہوئی۔ دوجے پاسے ایڈیشنل سیکرٹری الیکشن کمیشن اختر نذیر دا کہنا سی کہ عام انتخابات 25جولائی نوں ای ہون گے۔ اجلاس وچ حلقہ بندیاں تے نامزدگی فارم دا تفصیلی جائزہ لیا گیا۔ لاہور ہائی کورٹ دے فیصلے خلاف سپریم کرٹ جان دا فیصلا کیتااے۔ اوہناں نے آکھیا کہ سپریم کورٹ دے فیصلے اُتے پکا لائحہ عمل بناواں گے۔
