لاہور( پاکستان پوائنٹ نیوز01۔جون2018ء ) پنجاب سرکار نے ہاؤس ریکوزیشن پالیسی منظور کر لی اے، ہاؤس ریکوزیشن پالیسی دے تحت سرکاری ملازم ہن نجی گھر کرائے اُتے لے سکن گے، پالیسی بارے نوٹی فکیشن وی جاری کر دتا گیا اے۔ میڈیا رپورٹس مطابق پنجاب سرکار نے جاندے جاندے سرکاری ملازماں دا وڈا مسئلا حل کر دتا اے۔ سرکار نے سرکاری ملازماں لئی ہاؤس ریکوزیشن پالیسی منظور کر لی اے۔
ہاؤس ریکوزیشن پالیسی دے تحت سرکاری ملازم ہن نجی گھر کرائے اُتے لے سکن گے۔ حکومت نے ہاؤس ریکوزیشن پالیسی بارے نوٹی فکیشن وی جاری کر دتا اے۔ نوٹی فکیشن مطابق سرکاری ملازم جے چاہن تے ماں پیو دا گھر وی کرائے اُتے لے سکدے نیں۔ نوٹی فکیشن وچ ہور دسیا گیا کہ گریڈ 19دا افسر 25ہزار تے گریڈ 22دا افسر 45ہزار تیکر د اگھر لین دا مجاز ہوئے گا۔ گریڈ اک دا ملازم 3254رُپئے تے گریڈ 17دا افسر 19ہزار رُپئے تیکر گھر لے سکے گا۔ چیتے رہوے کہ ایس توں پہلاں سرکاری ملازماں نوں سرکاری گھر یاں فلیٹ لین لئی اوکڑاں دا ساہمنا کرنا پیندا سی۔ جے سرکاری گھر دستیاب نہیں ہوندا سی تے سرکاری ملازماں نوں گھر نہیں مل سکدا سی۔ پر ہن سرکاری ملازماں دیاں اوکڑاں حل ہو گئیاں نیں۔
