لاہور( پاکستان پوائنٹ نیوز01۔جون2018ء ) پی ٹی آئی ولوں نگران وزیر اعلا دے ناں اُتے یوٹرن دا سلسلا جاری اے، تحریک انصاف نے ہن ایاز میر دا ناں وی جاری کر دتا ، تحریک انصاف نے ہن نگران وزیر اعلا لئی چار ناں دتے نیں، ایہناں ناواں وچ حسن عسکری، اوریا مقبول جان، یعقوب اظہار تے ایاز میر دا ناں شامل اے۔ میڈیا رپورٹس مطابق تحریک انصاف دے ترجمان فواد چودھری نے آکھیا کہ اج دتے گئے 3ناواں اُتے ایکا ہوجائے گا۔
ایاز میر، حسن عسکری تے یعقوب اظہار دا ناں فائنل اے۔ اوہناں نے آکھیا کہ پارٹی وچ رابطیاں دی کمی اے۔ کوآڈینیشن وچ بہتری آنی چاہیدی۔ اوہناں نے اک سوال دے جواب وچ آکھیا کہ نگران وزیر اعلا دے ناں ساہمنے آ رہے نیں پر ایہدے وچ اینی پریشانی وال گل نہیں اے۔ ناصر درانی نے معذرت کر لی، ناصر کھوسہ دا ناں واپس لے لیا گیا ۔ پر فائنل کرنا محمود الرشید دا کم اے ۔
اوہناں دا کہنا سی کہ مینوں جو پارٹی لائن دیوے گی میں تے اوہدے اُتے گلاں کراں گا۔دوجے پاسے میاں محمود الرشید دا کہنا اے کہ پنجاب وچ نگران وزیر اعلا دے معاملات میں ویکھنے نیں ،جیہدے لئی عمران خان نال رابطے وچ آں۔ فواد چودھری دا کم مرکز وچ اے۔ایس حوالے نال سینئر سیاسی تجزیہ کار سلمان غانی نے آکھیا کہ فواد چودھری اجے وی کنفیوژن وچ نیں۔ تحریک انصاف دے حوالے نال ایس طرحاں دی کیفیت پیدا ہو رہی اے کہ اوہناں وچ سنجیدگی نہیں اے۔ پی ٹی آئی نوں آؤندی حکومتی جماعت دے طور اُتے ویکھیا جا رہیا اے۔ پر پی ٹی آئی ولوں کوئی سنجیدگی دا وکھالا نہیں کیتا گیا۔ معید پیرزادہ نے آکھیا کہ پی ٹی آئی نے ہوم ورک نہیں کر کے رکھیا ہویا۔
