لاہور( پاکستان پوائنٹ نیوز01۔جون2018ء ) کینسر دے روگ نال موت دے مونہ چلے جان والے آسٹریلوی مسلم نوجوان علی بنات دی اک نویں ویڈیو ساہمنے آئی اے۔تفصیل مطابق علی بنات اک بہت ای امیر نوجوان سی پر کینسر دی بیماری ہون مگروں اوہنے اپنی ساری دولت غریب لوکاں نوں ونڈ دتی سی۔ علی بنات دی اک ویڈیو ساہمنے آئی اے جو اوہ چاہندا سی کہ مرن مگروں ساہمنے آئے۔
ذکر کیتی گئی ویڈیو وچ علی بنات دا کہنا سی کہ تُسیں سارے جاندے او کہ الحمد اللہ میرا دور لنگھ گیا اے۔ میں اوہناں سارے لوکاں لئی اک نِکا جیہا ویڈیو کلپ بنانا چاہندا سی ۔ جیہناں نے میرا پہلے دن توں ساتھ دتا،مینوں سپورٹ کیتا تے ایس سفر وچ میرے نال رہے۔رب تہانوں ساریاں نوں ایہدا اجر دیوے گا۔ تُسیں مینوں تے میری تنظیم MATWنوں سپورٹ کردے رہنا۔
ویڈیو پیغام وچ بنات دا کہنا سی کہ میں سارے بھین بھراواں نوں اک نِکی جیہی نصیحت کرنا چاہنا واں، جیویں کہ تُسیں سارے جاندے او کہ ساڈے کول ساڈی زندگی وچ کاراں تے پیسہ سبھ کُجھ ہوندا اے۔ پر جدوں میں کینسر دا روگی سی تے مینوں بہت سارے لوکاں دے پیغام ملے کہ تہانوں جنت ملے گی۔ تُسیں مسلم کمیونٹی لئی بہت کُجھ کیتا اے پر ایہ کُجھ وی نہیں اے۔
ایہ ساڈے اُتے رب سوہنے دی مہربانی اے۔ ساڈے وچوں بہت سارے لوکاں نوں رب ولوں ایس گل دا پتا نہیں ہوندا کہ ساڈی موت کدوں آنی اے۔ ساڈے وچوں کُجھ لوک بلکہ بہت سارے ایس دنیا نوں اچانک چھڈ کے ٹُر جاندے نیں۔ اسیں بہت ساریاں ایس طرحاں دیاں کہانیاں سُنیاں نیں جیہدے وچ مُنڈے کُڑیاں کلباں وچ زندگی دی بازی ہار جاندیاں نیں۔ ایس لئی میرے بھین بھراؤ اپنی زندگی وچ اک مقصد بنا لوو، اک منصوبہ بنا لوو، جیہدے اُتے تُسیں کم کر سکو۔
جے تُسیں آپ ایہ کم نہیں کر سکدے تے تُسیں کسے ہور نال رلکے فنڈنگ راہیں وی ایہ کم کر سکدے او۔ پر تُسیں کُجھ نہ کُجھ ضرور کرو کیونکہ اوہدی تہانوں محشر دے دیہاڑے لوڑ ہوئے گی۔تے اوہ بھین بھرا جو ایس زندگی پچھے نیں ،اوہناں نوں ایہ کہنا چاہنا واں کہ زندگی دے دن لنگھ جاندے نیں بہت کُجھ بدلدا رہندا اے۔ بنات دا ویڈیو پیغام وچ کہنا سی کہ اسیں اسلام دی پیروی کرن دی بجائے اپنیاں خاہشاں پوریاں کرن اُتے توجہ دینے آں پر زندگی مذاق نہیں اے۔
سانوں محتاط رہن دی ضرورت اے۔ میں کدی کدی اپنے بیڈ اُتے لمے پے کے بہت رونا واں۔ ساڈی زندگی وچ اللہ کُجھ ایسے لوک لیاندا اے جیہناں بارے اسیں سوچیا وی نہیں ہوندا کہ اوہ ساڈی زندگی وچ شامل ہون گے۔کُجھ ایسے وی دوست بن جاندے نیں، جیہناں بارے تہانوں پتا وی نیں ہوندا۔
