اسلام آباد( پاکستان پوائنٹ نیوز01۔جون2018ء ) پاکستان تحریک انصاف دے رہنما شہریار آفریدی نے اسمبلی دے آخری دن سپیکرقومی اسمبلی ایاز صادق نوں زبردست خراج تحسین پیش کیتا۔ تفصیل مطابق پاکستان مسلم لیگ (ن) دی حکومت نے پچھلے دیہاڑے اپنی آئینی مدت پوری کر لی اے۔ قومی اسمبلی دے آخری اجلاس وچ پاکستان تحریک انصاف دے رکن شہریار خان آفریدی نے نکتہ اعتراض اُتے گل بات کردے ہوئے آکھیا کہ اختلاف اپنی تھاں پر میں تہانوں سلام پیش کرنا واں۔
اسیں تہاڈے خلاف ضمنی الیکشن وچ گھر گھر پھردے رہے، پر تسیں سانوں عزت دیندے رہے۔ شہریار آفریدی دا کہنا سی کہ ضمنی الیکشن وچ تقریبن اک مہینہ سردار ایاز دے حلقے وچ پھردا رہیا، ایتھوں تیکر کہ میں تحریک انصاف دی انتخابی مہم لئی ایاز صادق دے رشتے داراں گھر وی گیا تے اوہناں نے ایاز صادق نوں فون کر کے آکھیا کہ تہاڈا پارلیمنٹیرین تہاڈے حلقے وچ تہاڈے لوکاں کول آیا اے۔
شہریار آفریدی دا ہور کہنا سی کہ نظریات تے اختلافات اپنی تھاں پر میں تہانوں سلام پیش کرنا واں۔ اسیں بطور اپوزیشن بہت تنقید کیتی پر تُسیں ہمیشہ مینوں تے میری پارٹی نوں عزت دتی۔ میں تہانوں سلام پیش کرنا واں تے رب تہانوں عزت دیوے۔ چیتے رہوے کہ پچھلے دیہاڑے قومی اسمبلی دی آئینی مدت پوری ہو گئی۔ 2013دے الیکشن مگروں شروع ہون والا ایہ جمہوری دور اپنی مدت پوری کر چکیا اے۔ ایس آئینی مدت دوران قومی اسمبلی نے بہت سارے لاہ چڑھا ویکھے۔
